- Ауругъаннга – кийик саулукъ, джетген къызгъа – чилле джаулукъ.
- Сабийликде юретмесенг, уллу болса – тюзелмез.
- Чомартны къолун джокълукъ байлар.
- Чомарт къолда мал къалмаз.
- Кийимни бир кюнню аясанг, минг кюннге джарар.
- Сакъ юйюне сау барыр.
- Тюкюрюк баш джармаз, налат кёз чыгъармаз!
- Ишлерге уял да, ашаргъа табма.
- Аманны тукъумуна къарама, игини тукъумун сорма.
- Баланы адам этген анады.
- Сакъламагъан затынга джолукъсанг, не бек къууанаса, не бек ачыйса.
- Аш кетер да бет къалыр.
- Нафысынгы айтханын этме, намысынгы айтханын эт.
- Билимсиз иш бармаз.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Ата джурт – алтын бешик.
- Сагъыш – къартлыкъгъа сюйюмчю.
- Билимден уллу байлыкъ джокъду.
- Джарлы тюеге минсе да, ит къабар.
- Аман адам элни бир-бирине джау этер.
- Ач да бол, токъ да бол – намысынга бек бол.
- Ётюрюк хапар аякъ тюбю бла джюрюйдю.
- Намысы болмагъанны, сыйы болмаз.
- Ишин билген, аны сыйын чыгъарады.
- Нёгер болсанг, тенг бол, тенг болмасанг, кенг бол.
- Ариу сёз джыланны орнундан чыгъарыр.
- Байны къызы баймакъ болса да, юйде къалмаз!
- Ачыкъ джюрекге джол – ачыкъ.
- Джыланны къуйругъундан басарынг келсе, аны башы болгъанын унутма.
- Ашлыкъ – бюртюкден, джюн – тюкден.
- Адебсиз адам – джюгенсиз ат.
- Хунаны тюбюн къазсанг, юсюнге ауар.
- Уллу суу бла уллу ауруудан башынгы сакъла.
- Иги сеники эсе да, сюйген кесимикин этеме.
- Мал тутхан – май джалар.
- Бермеген къол, алмайды.
- Аз айтсам, кёб ангылагъыз.
- Кеси юйюмде мен да ханма.
- Джаш къарыу бла кючлю, къарт акъыл бла кючлю.
- Ётген ёмюр – акъгъан суу.
- Билгенни къолу къарны джандырыр.
- Акъыл къартда, джашда тюйюлдю – башдады.
- Билим ат болуб да чабар, къуш болуб да учар.
- Тешигини къатында, чычхан да батыр болур.
- Мен да «сен», дейме, сен да «кесим», дейсе.
- Айырылгъанланы айю ашар, бёлюннгенлени бёрю ашар.
- Къатын байлыкъны сюер, эр саулукъну сюер.
- Атлыны кёрсе, джаяуну буту талыр.
- Джюз элде джюз ёгюзюм болгъандан эсе, джюз джууугъум болсун.
- Игилик игилик бла сингдирилиучю затды.
Профиль
|
|
|||