- Байма, деб да, къууанма, джарлыма, деб да, джылама.
- Окъдан джара эртде-кеч болса да бителир, сёз джара, ёмюрге къалыр.
- Тыш элде солтан болгъандан эсе, кесинги элде олтан болгъан игиди!
- Таш бла ургъанны, аш бла ур.
- Ишин билген, аны сыйын чыгъарады.
- Насыб бютеу халкъны юлюшюдю.
- Этек чакъмакълары баш джаргъан, сёлешген сёзлери таш джаргъан.
- Кёкдеги болмаса, джердегин кёрмейди.
- Атадан ёксюз – бир ёксюз, анадан ёксюз – эки ёксюз.
- Хоншуну тауугъу къаз кёрюнюр, келини къыз кёрюнюр.
- Ариу сёзде ауруу джокъ.
- Эринчекни аурууу – кёб.
- Арба аугъандан сора, джол кёргюзтюучю кёб болур.
- Ана къойну – балагъа джандет.
- Къууут – джелге, берне – бошха.
- Аман адам этегингден тутса, кес да къач.
- Билмейме деген – бир сёз
- Мен да «сен», дейме, сен да «кесим», дейсе.
- Къыз келсе, джумуш эте келеди, къатын келсе, ушакъ эте келеди.
- Ач келгенни – тойдур, кеч келгенни – къондур.
- Къызны минг тилер, бир алыр.
- Адамны сыфатына къарама, сёзюне къара.
- Бойнуму джети джерден кессенг да, мен ол ишни этеллик тюлме.
- Джуртун къоругъан озар.
- Баш – акъыл ючюн, акъылман – халкъ ючюн.
- Таш ата билмеген, башына урур.
- Сакъалы текени да бар, мыйыгъы киштикни да бар.
- Ханы къызы буюгъа-буюгъа киштик болду.
- Джангыз терек къынгыр ёсер.
- Къатын къылыкъсыз, эр тынчлыкъсыз.
- Ичимден чыкъды хата, къайры барайым сата?
- Кёлю джокъну – джолу джокъ.
- Оюмсуз атлагъан, аджалсыз ёлюр.
- Минг тенг да азды, бир джау да кёбдю.
- Сескекли кесин билдирир.
- Ач – эснер, ат – кишнер.
- Къайгъыны сюйген, къайгъы табар.
- Ашхы сёз таш тешер.
- Биреуню тёрюнден, кесинги эшик артынг игиди.
- Мадар болса, къадар болур.
- Джылыгъа джылан илешир.
- Aдам боллукъ, сыфатындан белгили.
- Эр абынмай, эл танымаз.
- Хар адамгъа кеси миннген тау кибик.
- От кюйдюрген, сау болса да, тот кюйдюрген, сау болмаз.
- Эки къатын алгъанны къулагъы тынгнгаймаз.
- Элни кючю – эмеген.
- Къыз тиширыу кеси юйюнде да къонакъды.
- Эшекни не къадар тюйсенг да, ат болмаз.
- Джолда аягъынга сакъ бол, ушакъда тилинге сакъ бол.
Профиль
|
|
|
|||