- Кютгени беш эчки, сызгъыргъаны уа, джерни джарады.
- Бастасын ашагъан, хантусун да ичер.
- Сакъалы текени да бар, мыйыгъы киштикни да бар.
- Азыкъ аз болса, эртде орун сал.
- Башланнган иш битер, къымылдагъан тиш тюшер.
- Адам къаллай бир ишленмесе, аллай бир кесин уллу кёреди.
- Аман къатын алгъан, арыр, иги къатын алгъан джарыр.
- Айран тёгюлсе, джугъусу къалыр.
- Оюмсуз атлагъан, аджалсыз ёлюр.
- Аз сёлешген, къайгъысыз турур.
- Тойгъан джерге джети къайт.
- Аджашханны ызындагъы кёреди, джангылгъанны джанындагъы биледи.
- Чомарт къолда мал къалмаз.
- Къарнынг къанлынга кийирир.
- Байма, деб да, къууанма, джарлыма, деб да, джылама.
- Кёрмегеннге кебек – танг, битмегеннге сакъал – танг.
- Аууз сакълагъан – джан сакълар.
- Сёз – кюмюш, джыр – алтын.
- Чыкълы кюнде чыкъмагъан, чыкъса къуру кирмеген.
- Кийиминг бла танылма, адамлыкъ бла таныл.
- Ёлюр джаннга, ёкюл джокъ.
- Дууулдаса – бал чибин, къонса – къара чибин.
- Мал ёлсе, сюек къалыр, адам ёлсе, иши къалыр.
- Келгинчи, къонакъ уялыр, келгенден сора, къонакъбай уялыр.
- Арбаз сайлама да, хоншу сайла.
- Аш хазыр болса, иш харам болур.
- Къанны къан бла джуума, аманны аман бла къуума.
- Терслик кетер, тюзлюк джетер.
- Бети бедерден, намыс сакълама.
- Чомарт къонакъ юй иесин сыйлар.
- Байны къызы баймакъ болса да, юйде къалмаз!
- Къыйынлы джети элге оноу этер.
- Къазанны башы ачыкъ болса, итге уят керекди.
- Тешигини къатында, чычхан да батыр болур.
- Башсыз урчукъ тюзюне айланмаз.
- Окъ къызбайны джокълайды.
- Уллу айтханны этмеген – уллаймаз.
- Чомартха хар кюн да байрамды.
- Ата Джуртча джер болмаз, туугъан элча эл болмаз.
- Ауузу бла къуш тута айланады.
- Гыдай эчки суугъа къараб, мюйюзле кёрмесе, джашма алкъын, дегенди.
- Элде адам къалмаса, ит тахтагъа минер.
- Къуру гыбыт бек дыгъырдар.
- Аджаллыгъа окъсуз шкок атылыр.
- Ач – эснер, ат – кишнер.
- Кесинг сынамагъан затны, адамгъа буюрма.
- Джеринден айырылгъан – джети джылар, джуртундан айырылгъан – ёлгюнчю джылар.
- Уясында не кёрсе, учханында аны этер.
- Айныгъанлы алты кюн, тогъайгъанлы тогъуз кюн.
- Окъуу – билимни ачхычы, окъуу – дунияны бачхычы.
