- Иги болса, тамадама – махтау, аман болса, меннге – айыб.
- Кесине оноу эте билмеген, халкъына да эте билмез.
- Тойгъанлыкъ къойгъа джарашады.
- Ариуну – ауруу кёб.
- Дуния аламаты сен эсенг да, игиме деб айтма.
- Аман адамны тепсинге олтуртсанг, къызынгы тилер.
- Аман киши кеси юйюнде – къонакъ.
- Чакъырылмагъан къонакъ – орунсуз.
- Къазанчы аман болса, къазаны къайнамаз.
- Ётген ёмюр – акъгъан суу.
- Эркишини аманы тиширыуну джылатыр.
- Бал ашаргъа сюе эсенг, чибин ургъаннга тёз.
- Эллинг бла джау болсанг да, юйюнг бла джау болма.
- Чёбню кёлтюрсенг, тюбюнден сёз чыгъар.
- Атынг аманнга чыкъгъандан эсе, джанынг тамагъынгдан чыкъсын.
- Чыбыкълыкъда бюгюлмеген, къазыкълыкъда бюгюлмей эди.
- Къайгъы тюбю – тенгиз.
- Эм ашхы къайын ана мамукъ бла башынгы тешер.
- Ач уят къоймаз.
- Чарсда алчыны эл кёреди.
- Чомарт бергенин айтмаз.
- Тёзгеннге, джабылгъан эшик ачылыр.
- Къобан да къуру да къобханлай турмайды, адам да къуру да патчахлай турмайды.
- Аман къатын алгъан, арыр, иги къатын алгъан джарыр.
- Урама да – ёледи, сатама да – келеди.
- Насыблы элин сюер, насыбсыз кесин сюер.
- Эркиши – от, тиширыу – суу.
- Халкъны юйю – туугъан джери.
- Суугъа – таянма, джаугъа – ийнанма.
- Ёксюзню къалачы уллу кёрюнюр.
- Чакъырылмагъан джерге барма, чакъырылгъан джерден къалма.
- Сангырау къулакъ эл бузар.
- Эринчекге кюн узун.
- Иги адам абынса да, джангылмаз.
- Адам къаллай бир ишленмесе, аллай бир кесин уллу кёреди.
- Башы ишлегенни, ауузу да ишлер.
- Онгсузну – джакъла, тенгликни – сакъла.
- Ичимден чыкъды хата, къайры барайым сата?
- Таш бла ургъанны, аш бла ур.
- Мухардан ач ычхынмаз.
- Адебсиз адам – джюгенсиз ат.
- Ат басханны джер билед.
- Акъыл бла адеб эгизледиле.
- Ата Джуртуму башы болмасам да, босагъасында ташы болайым.
- Татлы сёз – балдан татлы.
- Джеринден айырылгъан – джети джылар, джуртундан айырылгъан – ёлгюнчю джылар.
- Рысхы – сют юсюнде кёмюк кибикди.
- Акъыл аздырмаз, билим тоздурмаз.
- Ётюрюкню башын керти кесер.
- Гугук кесини атын айтыб къычыргъанча, мен, мен деб нек тураса?