ТИШХАНЧЫКЪЛА ЖОМАГЪЫ
1
Бир чал тишхан болгъанды,
Аны къызы бар эди.
Кёрген – ариулугъуна,
Сукъланып, къарар эди.
Бир къарт тишхан болгъанды,
Аны жашы бар эди.
Кёрген – субайлыгъына
Эрикмей къарар эди.
Бир ариу къыз болгъанды, –
Чал атасы бар эди,
Аны хар айтхан сёзю
Ат багъасы бар эди.
Бир субай жаш болгъанды, –
Къарт анасы бар эди,
Аны хар айтхан сёзю
Балхам эди, бал эди.
Бир чал тишхан болгъанды,
Бир къарт тишхан болгъанды,
Бир ариу къыз болгъанды,
Бир субай жаш болгъанды.
Жаш айтханды къызчыкъгъа:
«Бизни юйге келсенг а!»
Къыз айтханды жашчыкъгъа:
«Атамдан тилесенг а!»
Бир чал тишхан болгъанды, –
Къызчыгъына сакъ эди.
Аны бек къарыулугъа
Берлиги да хакъ эди.
Бир субай жаш болгъанды, –
Ол къызны тилей эди:
«Менден кючлю дуньяда
Бир жан жокъду! – дей эди.
Бир чал тишхан болгъанды,
Аны кибик аз эди:
«Сен кючлю болсанг, киштик
Атангы тутмаз эди!»
2
– Киштик кючлю, киштик кючлю, –
Мен киштикге барлыкъма!
Киштик кючлю, киштик кючлю,
Мен киштикге барлыкъма! –
Деп жырлагъанды тишханчыкъ.
– Ай, мен кючлю болсам эди, тишханчыкъ,
Итден алай къачмаз эдим, тишханчыкъ, –
Деп, макъыргъанды киштик.
– Ит кючлю да, ит кючлю, –
Сора итге барлыкъма!
Ит кючлю да, ит кючлю,
Сора итге барлыкъма! –
Деп жырлагъанды тишханчыкъ.
– Ай, мен кючлю болсам эди, тишханчыкъ,
Мени бёрю къуумаз эди, тишханчыкъ, –
Деп, сынсыгъанды ит а.
– Бёрю кючлю, бёрю кючлю, –
Мен бёрюге барлыкъма!
Бёрю кючлю, бёрю кючлю,
Мен бёрюге барлыкъма! –
Деп жырлагъанды тишханчыкъ.
– Ай, мен кючлю болсам эди, тишханчыкъ,
Мени айыудан къоркъмаз эди, тишханчыкъ, –
Деп, улугъанды бёрю.
– Айыу кючлю, айыу кючлю, –
Мен айыугъа барлыкъма!
Айыу кючлю, айыу кючлю,
Мен айыугъа барлыкъма! –
Деп жырлагъанды тишханчыкъ.
– Ай, мен кючлю болсам эди, тишханчыкъ,
Мени къаплан тутмаз эди, тишханчыкъ, –
Деп, мурулдагъанды айыу.
– Къаплан кючлю, къаплан кючлю, –
Мен къапланнга барлыкъма!
Къаплан кючлю, къаплан кючлю,
Мен къапланнга барлыкъма! –
Деп жырлагъанды тишханчыкъ.
– Ай, мен кючлю болсам эди, тишханчыкъ,
Къоркъуп, пилге жол къоймазем, тишханчыкъ, –
Деп, къычыргъанды къаплан.
– Пил кючлю да, пил кючлю, –
Сора пилге барлыкъма!
Пил кючлю да, пил кючлю,
Сора пилге барлыкъма! –
Деп жырлагъанды тишханчыкъ.
– Ай, мен кючлю болсам эди, тишханчыкъ,
Ай, мен кючлю болсам эди, тишханчыкъ,
Къулагъыма кирмез эди тишханчыкъ.
Къара азап бермез эди тишханчыкъ! –
Дегенди пил да.
– Тишхан кючлю, тишхан кючлю, –
Мен тишханнга барлыкъма!
Тишхан кючлю, тишхан кючлю,
Мен тишханнга барлыкъма! –
Деп жырлагъанды да тишханчыкъ...
3
Бир чал тишхан болгъанды,
Аны къызы бар эди.
Бир къарт тишхан болгъанды,
Аны жашы бар эди.
Бир ариу къыз болгъанды,
Бир субай жаш болгъанды...
Сау дуньягъа айтылырча,
Бир уллу той болгъанды.
1991, Нальчик