- Адамны аманы адамны бети бла ойнар.
- Малны кют, джерни тюрт.
- Таякъ этден ётер, тил сюекден ётер.
- Узун джолну барсанг, бюгюн келирсе, къысха джолну барсанг, тамбла келирсе.
- Джаралыны джастыгъында сау ёлюр.
- Ач къарным, тынч къулагъым.
- Къобан да къуру да къобханлай турмайды, адам да къуру да патчахлай турмайды.
- Ишге юренсин къоллары, халкъ бла болсун джоллары.
- Джылар джаш, атасыны сакъалы бла ойнар.
- Суу да къайтады чыкъгъан джерине.
- Сыфатында болмагъаны, суратында болмаз.
- Босагъа таш юйге кирмей эди, тыбыр таш эшикге чыкъмай эди.
- Ургъан суудан башынгы сакъла.
- Ауузу бла къуш тута айланады.
- Аман киши кеси юйюнде – къонакъ.
- Рысхы джалгъанды: келген да этер, кетген да этер.
- Къарт болгъан джерде, берекет болур, сабий болгъан джерде, оюн болур.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Аджалсыз ёлюм болмаз.
- Джарлы эскисин джамаса, къууаныр.
- Аджаллыгъа окъсуз шкок атылыр.
- Тенгинг джокъ эсе – изле, бар эсе – сакъла!
- Билимден уллу байлыкъ джокъду.
- Кёз – сюйген джерде, къол – ауругъан джерде.
- Ишленмеклик адамлыкъды.
- Иги адам абынса да, джангылмаз.
- Намысы болмагъанны, сыйы болмаз.
- Байны къызы баймакъ болса да, юйде къалмаз!
- Ашхы адам – халкъ байлыгъы, ашхы джер – джашау байлыгъы.
- Джаз бир кюнню джатсанг, къыш талай кюнню абынырса.
- Тёзгеннге, джабылгъан эшик ачылыр.
- Джиби бир къат джетмей эди да, эки къат тарта эди.
- Къатын байлыкъны сюер, эр саулукъну сюер.
- Тили узунну, намысы – къысха.
- Къарнынг бла ёч алма.
- Тешик этген тынчды, аны джамагъан къыйынды.
- Ётюрюк хапар аякъ тюбю бла джюрюйдю.
- Къонакъ аман болса, къонакъбай джунчур
- Тешигини къатында, чычхан да батыр болур.
- Ач къалгъандан, кеч къалгъан къолай.
- Къолу уллу – асыу, аягъы уллу – джарсыу.
- Ёзденликни кёбю ётюрюк.
- Къан бла кирген, джан бла чыгъар.
- Чакъырылгъанны аты, чакъырылмагъанны багъасы болур.
- Тиширыусуз юй – отсуз от джагъа.
- Аджашхан тёгерек айланыр.
- Биреуге аманлыкъны тилеме да, кесинге ашхылыкъны тиле.
- Ашда – бёрю, ишде – ёлю.
- Дууулдаса – бал чибин, къонса – къара чибин.
- Ата – баланы уясы.
Профиль
|
|
|||