- Ашарыкъда сайлагъаннга – чий гырджын.
- Сакъ юйюне сау барыр.
- Арбаз сайлама да, хоншу сайла.
- Ат да турмайды бир териде.
- Тамбла алтындан бюгюн багъыр ашхы.
- Алим болгъандан эсе, адам болгъан къыйынды.
- Кимни – тили, тиши онглу, кимни – къолу, иши онглу.
- Келинни – келгинчи, бёркню кийгинчи кёр.
- Ашхы атаны – джашы ашхы, ашхы ананы – къызы ашхы.
- Хоншуну тауугъу къаз кёрюнюр, келини къыз кёрюнюр.
- Суугъа – чабакъ, къаягъа – ыргъакъ.
- Уруну арты – къуру.
- Къарыусузгъа кюлме, онгсузгъа тийме.
- Къарнынг тойгъунчу аша да, белинг талгъынчы ишле.
- Бети – къучакълар, джюреги – бычакълар.
- Чомартха Тейри да борчлуду.
- Кюлме джашха – келир башха.
- Адам сёзюнден белгили.
- Къызны минг тилер, бир алыр.
- Таукел къуру къалмаз.
- Чакъырылмагъан къонакъ къачан кетерин сормаз.
- Хантына кёре тузу, юйюне кёре къызы.
- Эл бла кёргенинг эрелей.
- Айтхан – тынч, этген – къыйын.
- Окъдан джара эртде-кеч болса да бителир, сёз джара, ёмюрге къалыр.
- Ата – баланы уясы.
- Ариу сёз – джаннга азыкъ, аман сёз – башха къазыкъ.
- Душманны тышы – акъ, ичи – къара.
- Къозулугъунда тоймагъан, къойлугъунда тоймаз.
- Къыйынлы джети элге оноу этер.
- Ишлемеген – тишлемез.
- Орундукъ тюбюнде атылсам да, орта джиликме, де да айлан.
- Къралынгы – душмандан, башынгы от бла суудан сакъла.
- От кюйдюрген, сау болса да, тот кюйдюрген, сау болмаз.
- Чомарт къолда мал къалмаз.
- Терек ауса, отунчу – кёб.
- Босагъа таш юйге кирмей эди, тыбыр таш эшикге чыкъмай эди.
- Чыбыкълыкъда бюгюлмеген, къазыкълыкъда бюгюлмей эди.
- Баланы адам этген анады.
- Къонакъ аман болса, къонакъбай джунчур
- Ёксюзню къалачы уллу кёрюнюр.
- Ачылгъан эт джабылыр, кёрген кёз унутмаз.
- Уллу сёзде уят джокъ.
- Джеринден айырылгъан – джети джылар, джуртундан айырылгъан – ёлгюнчю джылар.
- Артына баргъанны, къатына барма.
- Окъугъан озар, окъумагъан тозар.
- Джиби бир къат джетмей эди да, эки къат тарта эди.
- Сагъыш – къартлыкъгъа сюйюмчю.
- Джюрек кёзден алгъа кёрюр.
- Адеб базарда сатылмаз.
Профиль
|
|
|||