- Джашны джигитлиги сорулур, къызны джигерлиги сорулур.
- Тюкюрюк баш джармаз, налат кёз чыгъармаз!
- Эллинг бла джау болсанг да, юйюнг бла джау болма.
- Ойнай-ойнай кёз чыгъар.
- Мухардан ач ычхынмаз.
- Кесине гебен этелмеген, биреуге черен эте эди.
- Хар ишни да аллы къыйынды.
- Чомарт джарлы болмаз.
- Джумушакъ сёз къаты таякъны сындырыр.
- Аман къатын сабий табса, бий болур…
- Тёрдеги кюлсе, эшикдеги ышарыр.
- Тёгюлген тюгел джыйылмайды.
- Бетинги сатма, малынгы сат.
- Адам боллукъ, атламындан белгили болур.
- Эки итни арасына сюек атма, эки адамны арасында сёз чыгъарма.
- Чакъырылгъанны аты, чакъырылмагъанны багъасы болур.
- Акъыл аздырмаз, билим тоздурмаз.
- Чомарт къолда мал къалмаз.
- Ёгюзню мюйюзюнден тутадыла, адамны сёзюнден тутадыла.
- Насыблы элин сюер, насыбсыз кесин сюер.
- Ариу сёз аурууунгу алыр.
- Ауузу бла къуш тута айланады.
- Бети – къучакълар, джюреги – бычакълар.
- Кенгеш болса, уруш болмаз.
- Этни да ашады, бетни да ашады.
- Джолда аягъынга сакъ бол, ушакъда тилинге сакъ бол.
- Айран тёгюлсе, джугъусу къалыр.
- Келинни – келгинчи, бёркню кийгинчи кёр.
- Уллу къазанда бишген эт, чий къалмаз.
- Иги адам абынса да, джангылмаз.
- Къарын къуру болса, джюрек уру болур.
- Къазанда болса, чолпугъа чыгъар.
- Аз сёлешген, къайгъысыз турур.
- Къонакъны къачан кетерин сорма, къачан келлигин сор.
- Тешик этген тынчды, аны джамагъан къыйынды.
- Къалгъан ишге къар джауар.
- Джаным-тиним – окъуу, билим.
- Бюгюн дуния кибик, тамбла ахыратды.
- Асхат ашлыкъ сата, юйдегиси ачдан къата.
- Ариу сёз джыланны орнундан чыгъарыр.
- Ишге юренсин къоллары, халкъ бла болсун джоллары.
- Джыгъылгъанны сырты джерден тоймаз.
- Ач къалгъандан, кеч къалгъан къолай.
- Джумушакъ терекни къурт ашар.
- Ана къолу ачытмаз.
- Ашхы адам – халкъ байлыгъы, ашхы джер – джашау байлыгъы.
- Эринчекни эр алмаз, эр алса да, кёл салмаз, кёл салса да, кёб бармаз!
- Тойгъан джерге джети къайт.
- Айтылгъан сёз ызына къайтмаз.
- Агъач – джерни чырайы, кийим – эрни чырайы.
Профиль
|
|
|||