- Башы джабылгъан челекге, кир тюшмез.
- Билмегенинги, билгеннге сор.
- Намысы болмагъанны, сыйы болмаз.
- Къартны бурнун сюрт да, оноугъа тут.
- Ариу сёз джыланны орнундан чыгъарыр.
- Ашаса, ашамаса да, бёрюню ауузу – къан.
- Ишни аллы бла къууанма да, арты бла къууан.
- Ата Джуртуму башы болмасам да, босагъасында ташы болайым.
- Юйлю уругъа ит чабмаз.
- Ариу сёзде ауруу джокъ.
- Бичгенде ашыкъма, тикгенде ашыкъ.
- Артына баргъанны, къатына барма.
- Кийимни бир кюнню аясанг, минг кюннге джарар.
- Адебни адебсизден юрен.
- Джахил болса анасы, не билликди баласы?
- Мал тутхан – май джалар.
- Таукелге нюр джауар.
- Ариу сёз – джаннга азыкъ, аман сёз – башха къазыкъ.
- Эки элинги тыйсанг, джети элде махталырса.
- Ат басханны джер билед.
- Сёз сёзню айтдырыр.
- Абынмазлыкъ аякъ джокъ, джангылмазлыкъ джаякъ джокъ.
- Ёгюзню мюйюзлери ауурлукъ этмейдиле.
- Аман адам элни бир-бирине джау этер.
- Аманны эки битли тону болур, бирин сеннге кийдирир, бирин кеси киер.
- Ашхылыкъ джерде джатмайды, аманлыкъ суугъа батмайды.
- Ётюрюкню башын керти кесер.
- Кёл – къызбай, къол – батыр.
- Иесиз малны бёрю ашар.
- Намысы джокъну – дуниясы джокъ.
- Тилде сюек болмаса да, сюек сындырыр.
- Ишлегенден, къарагъан уста.
- Джашда акъыл джокъ, къартда къарыу джокъ.
- Ариуну – ауруу кёб.
- Миллетни бойну – базыкъ, аны бла кюрешген – джазыкъ.
- Кёрмегеннге кебек – танг, битмегеннге сакъал – танг.
- Адам къыйынлыгъын кёлтюрюр, зауукълугъун кёлтюрмез.
- Джарлыны эшигин махтагъан джабар.
- Къарны аманнга къазан такъдырма, къолу аманнга от джакъдырма.
- Эм уллу байлыкъ – джан саулукъ.
- Гитче джилтин уллу элни джандырыр.
- Ишни ахырын ойламай, аллын башлама.
- Телиге от эт десенг, юйюнге от салыр.
- Юйюнг бла джау болгъандан эсе, элинг бла джау бол.
- Накъырда – кертини келечиси.
- Билим къая тешер.
- Аджашханны ызындагъы кёреди, джангылгъанны джанындагъы биледи.
- Джаханимни кёрмей, джандетге кёл салмазса.
- Къолу уллу – асыу, аягъы уллу – джарсыу.
- Аякъларынгы джууургъанынга кёре узат.
Профиль
|
|
|||