- Кёзю сокъурдан – къоркъма, кёлю сокъурдан – къоркъ.
- Къралынгы – душмандан, башынгы от бла суудан сакъла.
- Зар адам ашынгы ашар, кесинги сатар.
- Сууда джау джокъ, кёб сёзде магъана джокъ.
- Сабийни джумушха джибер да, ызындан бар.
- Ач келгенни – тойдур, кеч келгенни – къондур.
- Хар адамгъа кеси миннген тау кибик.
- Ачны эсинде – аш.
- Къонагъы джокъну – шоху джокъ.
- Кесинге джетмегенни, кёб сёлешме.
- Къулакъдан эсе, кёзге ышан.
- Ач къарным, тынч къулагъым.
- Биреуню тёрюнден, кесинги эшик артынг игиди.
- Акъыл неден да кючлюдю.
- Аз сёлеш, кёб ишле.
- Этек чакъмакълары баш джаргъан, сёлешген сёзлери таш джаргъан.
- Къыз чыгъаргъан – къызыл къымжа.
- Юй кюйдю да, кюйюз чыкъды, ортасындан тюйюш чыкъды.
- Ишге юренсин къоллары, халкъ бла болсун джоллары.
- Кёпюр салгъан кеси ётер, уру къазгъан кеси кетер.
- Тамчы таш тешер.
- Чакъырылмагъан джерге барма, чакъырылгъан джерден къалма.
- Кесине гебен этелмеген, биреуге черен эте эди.
- Иги сёз – джаннга азыкъ, аман сёз башха – къазыкъ.
- Булут кёкге джарашыу, уят бетге джарашыу.
- Бети – къучакълар, джюреги – бычакълар.
- Джюрек кёзден алгъа кёрюр.
- Ариуну – ауруу кёб.
- Биреуге аманлыкъ этиб, кесинге игилик табмазса.
- Эринчекге кюн узун.
- Байлыкъдан саулукъ ашхыды.
- Сескекли кесин билдирир.
- Чомарт бергенин айтмаз.
- Акъылсызны джууукъгъа алма, акъыллыны кенгнге салма.
- Ёгюзню мюйюзлери ауурлукъ этмейдиле.
- Хар ишни да аллы къыйынды.
- Сабыр джетер муратха, сабырсыз къалыр уятха.
- Окъ къызбайны джокълайды.
- Ата Джуртча джер болмаз, туугъан элча эл болмаз.
- Тили узунну, намысы – къысха.
- Сютден ауузу кюйген, суугъа юфгюре эди.
- Акъыллы башны – тили къысха.
- Ушамагъан – джукъмаз.
- Намысы болмагъанны, сыйы болмаз.
- Таугъа чыгъаллыкъ эсенг, тюзде къалма.
- Намыс сатылыб алынмайды.
- Адам сёзюнден белгили.
- Ач да бол, токъ да бол – намысынга бек бол.
- Телини эшигин, махтау джабар.
- Тёгюлген тюгел джыйылмайды.
Профиль
|
|
|||