- Чомарт къонакъ юй иесин сыйлар.
- Кирсизни – саны таза, халалны – къаны таза.
- Джашны джигитлиги сорулур, къызны джигерлиги сорулур.
- Сабий болмагъан джерде, мёлек болмаз.
- Окъдан джара эртде-кеч болса да бителир, сёз джара, ёмюрге къалыр.
- Чоюнну башы ачыкъ болса, итге уят керекди.
- Кёкдеги болмаса, джердегин кёрмейди.
- Ауругъан – джашаудан умутчу.
- Къоркъакъны кёзю экили кёрюр.
- Джумушакъ сёз къаты таякъны сындырыр.
- Джауумдан сора, кюн кюйдюрюр, ётюрюкден сора, айыб кюйдюрюр.
- Биреу ашаб къутулур, биреу джалаб тутулур.
- Ачылгъан эт джабылыр, кёрген кёз унутмаз.
- Аурууну келиую тынч, кетиую – къыйын.
- Джангыз терек къынгыр ёсер.
- Адамны адамлыгъы къыйынлыкъда айгъакъланады.
- Рысхы джалгъанды: келген да этер, кетген да этер.
- Мал кёб болса, джууукъ кёб болур.
- Акъдан къара болмаз.
- Азыгъы аз, алгъа къабар, аты аман, алгъа чабар.
- Ханнга да келеди хариблик.
- Харам къарнашдан, халал тенг ашхы.
- Айырылмаз джууугъунга, унутмаз сёзню айтма.
- Сёз сёзню айтдырыр.
- Тилсиз миллет джокъ болур.
- Джырчы ёлсе, джыры къалыр.
- Акъыл аздырмаз, билим тоздурмаз.
- Юйюнгден чыкъдынг – кюнюнгден чыкъдынг.
- Биреуню тёрюнден, кесинги эшик артынг игиди.
- Элде адам къалмаса, ит тахтагъа минер.
- Алгъанда – джууукъ, бергенде – джау.
- Мал ёлсе, сюек къалыр, адам ёлсе, иши къалыр.
- Къыз чыгъаргъан – къызыл къымжа.
- Тойгъандан сора, ашны сёкме.
- Хар адамгъа кеси миннген тау кибик.
- Ач да бол, токъ да бол – намысынга бек бол.
- Къумурсхала джыйылсала, пилни да джыгъадыла.
- Къызын тута билмеген, тул этер, джашын тута билмеген, къул этер.
- Рысхы – насыбха къор.
- Ашлыкъ – бюртюкден, джюн – тюкден.
- Таукелге нюр джауар.
- Эл элде бирер малынг болгъандан эсе, бирер тенгинг болсун.
- Мадар болса, къадар болур.
- Ауузу аманнга «иги», деме.
- Ким бла джюрюсенг, аны кёзю бла кёрюнюрсе.
- Къобан да къуру да къобханлай турмайды, адам да къуру да патчахлай турмайды.
- Адамны артындан къара сабан сюрме.
- Насыблы элин сюер, насыбсыз кесин сюер.
- Эркишиге тары кебек танг кёрюнюр.
- Сагъыш – къартлыкъгъа сюйюмчю.
Профиль
|
||||