- Къыз тиширыу кеси юйюнде да къонакъды.
- Бастасын ашагъан, хантусун да ичер.
- Адамны сабийин сюйген джюреги, бычакъча, джитиди.
- Чомарт къолда мал къалмаз.
- Къайгъыны сюйген, къайгъы табар.
- Намыс сатылыб алынмайды.
- Билим насыб берир, билим джолну керир.
- Ашын ашагъанынгы, башын да сыйла.
- Ата Джуртча джер болмаз, туугъан элча эл болмаз.
- Ана – юйню кюн джарыгъы.
- Окъуу – билимни ачхычы, окъуу – дунияны бачхычы.
- Эркишиге тары кебек танг кёрюнюр.
- Ариу – кёзге, акъыл – джюрекге.
- Адамны артындан къара сабан сюрме.
- Таукел къуру къалмаз.
- Тил джюрекге джол ишлейди.
- Узун джолну барсанг, бюгюн келирсе, къысха джолну барсанг, тамбла келирсе.
- Айран ичген – къутулду, джугъусун джалагъан – тутулду.
- Кёб къычыргъандан – къоркъма, тынч олтургъандан – къоркъ.
- Ач келгенни – тойдур, кеч келгенни – къондур.
- Байлыкъ болгъан джерде, тынчлыкъ джокъду.
- Къолунгдан къуймакъ ашатсанг да, атаны борчундан къутулмазса.
- Эринчекни эр алмаз, эр алса да, кёл салмаз, кёл салса да, кёб бармаз!
- Дуния мал дунияда къалады.
- Биреуню эскиси биреуге джангы болмайды.
- Элиб деген, элге болушур.
- Суугъа – таянма, джаугъа – ийнанма.
- Экиндини кеч къылсанг, чабыб джетер ашхам.
- Къатыны харакетли болса, эри къымсыз болур.
- Иги бла джюрюсенг, джетерсе муратынга, аман бла джюрюсенг, къалырса уятха.
- Кёл – къызбай, къол – батыр.
- Алгъанда – джууукъ, бергенде – джау.
- Бети – къучакълар, джюреги – бычакълар.
- Къанны къан бла джуума, аманны аман бла къуума.
- Намыс болмагъан джерде, насыб болмаз.
- Ашхы – джыяр, аман – джояр.
- Малны кют, джерни тюрт.
- Урунуу – насыбны анасы.
- Къызгъанчдан ычхыныр, мухардан ычхынмаз.
- Садакъачыны джаны – къапчыгъында.
- Акъыл сабырлыкъ берир.
- Мени джылытмагъан кюн, меннге тиймесин!
- Джангыз терек къынгыр ёсер.
- Уллу суу бла уллу ауруудан башынгы сакъла.
- Кюн – узун, ёмюр – къысха.
- Къыйынлы джети элге оноу этер.
- Джырчы джырчыгъа – къарнаш.
- Сабийни джумушха джибер да, ызындан бар.
- Киштикге къанат битсе, чыпчыкъ къалмаз эди.
- Уллу къазанда бишген эт, чий къалмаз.
Профиль
|
|
|
|||