- Ышармагъан – кюлмез, кюлмеген – къууанчны билмез.
- Ойнай-ойнай кёз чыгъар.
- Бал ашаргъа сюе эсенг, чибин ургъаннга тёз.
- Къызын тута билмеген, тул этер, джашын тута билмеген, къул этер.
- Адамны сыфатына къарама, сёзюне къара.
- Къыз келсе, джумуш эте келеди, къатын келсе, ушакъ эте келеди.
- Иши джокъну, сыйы джокъ.
- Къарнынг бла ёч алма.
- Тёрде – темир таякълы, къаяда – чыпчыкъ аякълы.
- Чарсда алчыны эл кёреди.
- Адебни адебсизден юрен.
- Байлыкъ болгъан джерде, тынчлыкъ джокъду.
- Кёрмегеннге кебек – танг, битмегеннге сакъал – танг.
- Дуния малгъа сатылма, кесингден телиге къатылма.
- Окъумагъан сокъурду, сокъур ташха абыныр!
- Тенги кёбню джау алмаз, акъылы кёбню дау алмаз.
- Ишленмеген джаш – джюгенсиз ат, ишленмеген къыз – тузсуз хант.
- Ауругъанны сау билмез, ач къарынны токъ билмез.
- Танг атмайма десе да, кюн къоярыкъ тюйюлдю.
- Рысхы – насыбха къор.
- Таула не мийик болсала да, аууш табылыр.
- Садакъачыны джаны – къапчыгъында.
- Къоркъакъны кёзю экили кёрюр.
- Тик ёргени, тик энгишгеси да болады.
- Алтыда кюлмеген, алтмышда кюлмез.
- Кечеси – аяз, кюню – къыш, джарлы къаргъагъа бир аш тюш!
- Ачыу алгъа келсе, акъыл артха къалады.
- Къызбайны юйюне дери сюрсенг, батыр болур.
- Ишлемеген – тишлемез.
- Киштикге къанат битсе, чыпчыкъ къалмаз эди.
- Халкъны юйю – туугъан джери.
- Аджашхан тёгерек айланыр.
- Байлыкъдан саулукъ ашхыды.
- Адамны адамлыгъы къыйынлыкъда айгъакъланады.
- Тулпарлыкъ, билекден тюл – джюрекден.
- Биреуге аманлыкъны тилеме да, кесинге ашхылыкъны тиле.
- Чабар ат – джетген къыз.
- Адеб джокъда, намыс джокъ.
- Мадар болса, къадар болур.
- Атлыны кёрсе, джаяуну буту талыр.
- Ёлген ийнек сютлю болур.
- Къызны минг тилер, бир алыр.
- Тилсиз миллет джокъ болур.
- Ана кёлю – балада, бала кёлю – талада.
- Джырчы джырчыгъа – къарнаш.
- Джуртун къоругъан озар.
- Босагъагъа джууукъ орун болса, ашыгъыб тёрге озма.
- Эркиши – от, тиширыу – суу.
- Ариу сёзде ауруу джокъ.
- Зар адамны насыбы болмаз.
Профиль
|
|
|
|||