- Таш ата билмеген, башына урур.
- Джарлыны эшигин махтагъан джабар.
- Бет бетге къараса, бет да джерге къарар.
- Тойгъанлыкъ къойгъа джарашады.
- Акъыл неден да кючлюдю.
- Мал кёб болса, джууукъ кёб болур.
- Ач отунчуну ачыуу – бурнунда.
- Харам къарнашдан, халал тенг ашхы.
- Эркишиге тары кебек танг кёрюнюр.
- Эски джаугъа ышанма.
- Тёзгеннге, джабылгъан эшик ачылыр.
- Адебсиз адам – джюгенсиз ат.
- Кёбге таш атма.
- Ариу сёз аурууунгу алыр.
- Чабакъгъа акъыл, табагъа тюшсе келеди.
- Къан бла кирген, джан бла чыгъар.
- Тюкюрюк баш джармаз, налат кёз чыгъармаз!
- Арба аугъандан сора, джол кёргюзтюучю кёб болур.
- Билмегенинги, билгеннге сор.
- Байлыкъ болгъан джерде, тынчлыкъ джокъду.
- Джангыз терек къынгыр ёсер.
- Бозанг болмагъан джерге, къалагъынгы сукъма.
- Кюн кёрмеген, кюн кёрсе, кюндюз чыракъ джандырыр.
- Уллу суу бла уллу ауруудан башынгы сакъла.
- Къазанчы аман болса, къазаны къайнамаз.
- Малны кют, джерни тюрт.
- Джети тилни билген джети кишиди.
- Джангызны оту джарыкъ джанмаз!
- Джолунга кёре – джюрюшюнг, джагъанга кёре – юлюшюнг.
- Дууулдаса – бал чибин, къонса – къара чибин.
- Садакъачыны джаны – къапчыгъында.
- Аз айтсам, кёб ангылагъыз.
- Сабийликде юретмесенг, уллу болса – тюзелмез.
- Иги сеники эсе да, сюйген кесимикин этеме.
- Иги – алгъыш этер, аман – къаргъыш этер.
- Арпа, будай – ащды, алтын, кюмюш а – ташды.
- Сютден ауузу кюйген, суугъа юфгюре эди.
- Онгсузну – джакъла, тенгликни – сакъла.
- Ариу сёз – къылычдан джити.
- Хунаны тюбюн къазсанг, юсюнге ауар.
- Бозаны арты дауур болур.
- Тил – миллетни джаны.
- Тил бла келеди джыр да.
- Кюлме джашха – келир башха.
- Шайтан алдады, тюзлюк къаргъады.
- Халкъгъа джарагъан, джарлы къалмаз.
- Джаз бир кюнню джатсанг, къыш талай кюнню абынырса.
- Окъугъанны бети джарыкъ.
- Аманны къуугъан, аманлыкъ табар.
- Чомартны къолун джокълукъ байлар.
Профиль
|
|
|
|||