- Ашда уялгъан – мухар, ишде уялгъан – хомух.
- Нёгерсизни джолу узун.
- Къарыусузгъа кюлме, онгсузгъа тийме.
- Нафысынгы айтханын этме, намысынгы айтханын эт.
- Эр абынмай, эл танымаз.
- Ауругъаннга – кийик саулукъ, джетген къызгъа – чилле джаулукъ.
- Тил бла келеди джыр да.
- Бети бедерден, намыс сакълама.
- Ач бёрюге мекям джокъ.
- Ачлыкъда тары гырджын халыуадан татлы.
- Тик ёргени, тик энгишгеси да болады.
- Таш ата билмеген, башына урур.
- Къатын къылыкъсыз, эр тынчлыкъсыз.
- Aдам боллукъ, сыфатындан белгили.
- Кёб джашагъан – кёб билир.
- Ётюрюк хапар аякъ тюбю бла джюрюйдю.
- Кюн – узун, ёмюр – къысха.
- Бал чибинни ургъаны – ачы, балы – татлы.
- Иши джокъну, сыйы джокъ.
- Сакъламагъан затынга джолукъсанг, не бек къууанаса, не бек ачыйса.
- Аман адам этегингден тутса, кес да къач.
- Джаш къарыу бла кючлю, къарт акъыл бла кючлю.
- Кесине гебен этелмеген, биреуге черен эте эди.
- Аджашханны ызындагъы кёреди, джангылгъанны джанындагъы биледи.
- Байдан умут эте, джарлыдан ёгюз багъасы къорады.
- Хар зат кесини орнуна иги.
- Ёпкелегенни ашы татлы болады.
- Бек ашыкъгъан меннге джетсин, дегенди аракъы.
- Аджаллыгъа окъсуз шкок атылыр.
- Эл ауузу – элек, анга ийнаннган – халек.
- Шапа кёб болса, аш татымсыз болур.
- Тилде сюек болмаса да, сюек сындырыр.
- Уллу къазанда бишген эт, чий къалмаз.
- Ашда – бёрю, ишде – ёлю.
- Тилчи тилден къаныкъмаз.
- Сёз къанатсыз учар.
- Тин – байлыгъынг, терен саулугъунг.
- Кийим тукъум сордурур.
- Акъыллы эркиши атын махтар, акъылсыз эркиши къатынын махтар.
- Адамны джюреги нени кёрюрге сюйсе, кёзю да аны кёрюрге ёч болады.
- Ашын ашагъанынгы, башын да сыйла.
- Юреннген ауруу къалмаз.
- Джашынгы кесинг юретмесенг, джашау юретир.
- Билимсиз иш бармаз.
- Джаханимни кёрмей, джандетге кёл салмазса.
- Эте билген, этген этеди, эте билмеген, юретген этеди!
- Тамбла алтындан бюгюн багъыр ашхы.
- Ёгюзню мюйюзлери ауурлукъ этмейдиле.
- Уясында не кёрсе, учханында аны этер.
- Урама да – ёледи, сатама да – келеди.
Профиль
|
||||