- Тюз сёз баргъан сууну тыяр.
- Ишлерге уял да, ашаргъа табма.
- Тилсиз миллет джокъ болур.
- Арбаз къынгырды да, ийнек сауалмайма.
- Ашлыкъ – бюртюкден, джюн – тюкден.
- Телиге акъыл салгъандан эсе, ёлгеннге джан салырса.
- Къатын байлыкъны сюер, эр саулукъну сюер.
- Чёбню кёлтюрсенг, тюбюнден сёз чыгъар.
- Ашхылыкъ джерде джатмайды, аманлыкъ суугъа батмайды.
- Ёнгкюч къууана барыр, джылай келир.
- Зарда марда джокъ.
- Аз сёлеш, кёб ишле.
- Хата – гитчеден.
- Аман къатын алгъан, арыр, иги къатын алгъан джарыр.
- Ашхы атаны – джашы ашхы, ашхы ананы – къызы ашхы.
- Окъугъанны бети джарыкъ.
- Ана – юйню кюн джарыгъы.
- Халкъгъа джарагъан, джарлы къалмаз.
- Чабакъ башындан чирийди.
- Чомарт къолда мал къалмаз.
- Ашхы болсанг, атынг чыгъар, аман болсанг, джанынг чыгъар.
- Ашда уялгъан – мухар, ишде уялгъан – хомух.
- Ёлюр джаннга, ёкюл джокъ.
- Джангызны оту джарыкъ джанмаз!
- Азыкълы ат арымаз, къатыны аман джарымаз.
- Тыш элде солтан болгъандан эсе, кесинги элде олтан болгъан игиди!
- Гыдай эчки суугъа къараб, мюйюзле кёрмесе, джашма алкъын, дегенди.
- Джаш къарыу бла кючлю, къарт акъыл бла кючлю.
- Бети – къучакълар, джюреги – бычакълар.
- Махтаннган къыз, тойда джукълар.
- Ач бёрюге мекям джокъ.
- Ана къолу ачытмаз.
- Джаралыны джастыгъында сау ёлюр.
- Къайгъыны сюйген, къайгъы табар.
- Баш – акъыл ючюн, акъылман – халкъ ючюн.
- Тынгылагъан тынгы бузар.
- Джангыз терек къынгыр ёсер.
- Къоркъакъны кёзю экили кёрюр.
- Игиге айтсанг – билир, аманнга айтсанг – кюлюр.
- Тил бла келеди джыр да.
- Ашхы сёз таш тешер.
- Гырджын – тепсини тамадасы.
- Тойгъан джерден туугъан джер игиди.
- Кёзден кетген, кёлден да кетеди.
- Ариу сёз – къылычдан джити.
- Башынга джетмегенни сорма.
- Чабакъсыз кёлге къармакъ салгъанлыкъгъа, чабакъ тутмазса.
- Ариу джол аджал келтирмез.
- Тюзню ётмеги тюзде къалса да, тас болмаз.
- Ётген ёмюр – акъгъан суу.
Профиль
|
|
|
|||