- Ким бла джюрюсенг, аны кёзю бла кёрюнюрсе.
- Нёгерсизни джолу узун.
- Кёб джашагъан – кёб билир.
- Эрине къаргъыш этген къатын, эрнин къабар.
- Акъыл аздырмаз, билим тоздурмаз.
- Аш кетер да бет къалыр.
- Эри аманны, къатыны – аман.
- Окъдан джара эртде-кеч болса да бителир, сёз джара, ёмюрге къалыр.
- Кеси юйюмде мен да ханма.
- Тюз сёз баргъан сууну тыяр.
- Чакъырылмагъан къонакъ тёрге атламаз.
- Аякъларынгы джууургъанынга кёре узат.
- Магъанасыз сёз – тауушсуз сыбызгъы.
- Арпа, будай – ащды, алтын, кюмюш а – ташды.
- Урунуу – насыбны анасы.
- Джашынгы кесинг юретмесенг, джашау юретир.
- Чомарт джарлы болмаз.
- Джети тилни билген джети кишиди.
- Соргъан айыб тюлдю, билмеген айыбды.
- Таш ата билмеген, башына урур.
- Къуллукъчума, деб махтанма, къуллукъ – хаух джамчыды!
- Олтуруб кёрюнмей эди да, ёрге туруб кёрюне эди.
- Кимни – тили, тиши онглу, кимни – къолу, иши онглу.
- Ана къолу ачытмаз.
- Чомартха Тейри да борчлуду.
- Тил джюрекге джол ишлейди.
- Къарыусузгъа кюлме, онгсузгъа тийме.
- Айраннга суу къош, телиге джол бош.
- Ачыу алгъа келсе, акъыл артха къалады.
- Тау башында, тау болмаз, джангыз терек, бау болмаз.
- Джаханимни кёрмей, джандетге кёл салмазса.
- Нафысынгы айтханын этме, намысынгы айтханын эт.
- Ёзденликни кёбю ётюрюк.
- Джуртун къоругъан озар.
- Мухарны эси – ашарыкъда.
- Байлыкъдан саулукъ ашхыды.
- Таукел тауну аудурур.
- Ата Джуртча джер болмаз, туугъан элча эл болмаз.
- Ата джурт – алтын бешик.
- Къарнынг тойгъунчу аша да, белинг талгъынчы ишле.
- Джыгъылгъанны сырты джерден тоймаз.
- Баланы адам этген анады.
- Бир онгсуз адам адет чыгъарды, деб эштирик тюлсе.
- Сабийликде юретмесенг, уллу болса – тюзелмез.
- Джарашыу сюйген – джалынчакъ.
- Тойгъан джерге джети къайт.
- Чабакъгъа акъыл, табагъа тюшсе келеди.
- Хар сёзню орну барды.
- Чомартны къолун джокълукъ байлар.
- Джукъу тёшек сайламайды.
Профиль
|
|
|||