- Иесиз малны бёрю ашар.
- Кюл тюбюндеги от кёрюнмейди.
- Джылкъыдан – ат чыгъар, тукъумдан – джаш чыгъар.
- Ишленмеген джаш – джюгенсиз ат, ишленмеген къыз – тузсуз хант.
- Кёбге таш атма.
- Билимли ёлмез, билимсиз кёрмез.
- Иги бла джюрюсенг, джетерсе муратынга, аман бла джюрюсенг, къалырса уятха.
- Къан бла кирген, джан бла чыгъар.
- Элиб деген, элге болушур.
- Кесинге джетмегенни, кёб сёлешме.
- Джогъун бар этген, барын бал этген.
- Ач келгенни – тойдур, кеч келгенни – къондур.
- Урама да – ёледи, сатама да – келеди.
- Ёпкелегенни ашы татлы болады.
- Уллу сёлешме да, уллу къаб.
- Кёл – къызбай, къол – батыр.
- Адебни адебсизден юрен.
- Акъдан къара болмаз.
- Эртде тургъан джылкъычыны эркек аты тай табар.
- Эл ауузу – элек, анга ийнаннган – халек.
- Къызны минг тилер, бир алыр.
- Мухардан ач ычхынмаз.
- Джетген къыз джерли эшекни танымаз.
- Джумушакъ сёз къаты таякъны сындырыр.
- Бал ашаргъа сюе эсенг, чибин ургъаннга тёз.
- Насыб бютеу халкъны юлюшюдю.
- Байлыкъ келсе, акъыл кетер.
- Таула не мийик болсала да, аууш табылыр.
- Сормай – алма, чакъырылмай – барма.
- Азыкъ аз болса, эртде орун сал.
- Сакъламагъан затынга джолукъсанг, не бек къууанаса, не бек ачыйса.
- Тешик этген тынчды, аны джамагъан къыйынды.
- Хар зат кесини орнуна иги.
- Кюн кёрмеген, кюн кёрсе, кюндюз чыракъ джандырыр.
- Адебсиз адам – джюгенсиз ат.
- Аман адамны тепсинге олтуртсанг, къызынгы тилер.
- Атлыны ашхысы, ат тизгининден билинир
- Кюн – узун, ёмюр – къысха.
- Халкъны джырын джырласанг, халкъ санга эжиу этер.
- Акъыл бла адеб эгизледиле.
- Аман адам этегингден тутса, кес да къач.
- Ауругъаннга – кийик саулукъ, джетген къызгъа – чилле джаулукъ.
- Джырчы джырчыгъа – къарнаш.
- Чомарт бергенин айтмаз.
- Ат басханны джер билед.
- Акъылсызны джууукъгъа алма, акъыллыны кенгнге салма.
- Зарда марда джокъ.
- Джолунга кёре – джюрюшюнг, джагъанга кёре – юлюшюнг.
- Джырчы ёлсе, джыры къалыр.
- Аман адам элни бир-бирине джау этер.
Профиль
|
|
|||