- Тин – байлыгъынг, терен саулугъунг.
- Къонакъны къачан кетерин сорма, къачан келлигин сор.
- Душманны тышы – акъ, ичи – къара.
- Минг тенг да азды, бир джау да кёбдю.
- Иги сёз – джаннга азыкъ, аман сёз башха – къазыкъ.
- Таугъа чыгъаллыкъ эсенг, тюзде къалма.
- Келгинчи, къонакъ уялыр, келгенден сора, къонакъбай уялыр.
- Джашны джигитлиги сорулур, къызны джигерлиги сорулур.
- Аш иеси бла татлыды.
- Бир онгсуз адам адет чыгъарды, деб эштирик тюлсе.
- Акъыллы – эл иеси, тели – эл баласы.
- Джети тилни билген джети кишиди.
- Аман адам этегингден тутса, кес да къач.
- Джарлы тюеге минсе да, ит къабар.
- Джаным-тиним – окъуу, билим.
- Келинни – келгинчи, бёркню кийгинчи кёр.
- Арбаз сайлама да, хоншу сайла.
- Мадар болса, къадар болур.
- Башланнган иш битер, къымылдагъан тиш тюшер.
- Ата Джуртча джер болмаз, туугъан элча эл болмаз.
- Айыбны суу бла джууалмазса.
- Ач – эснер, ат – кишнер.
- Азыкълы ат арымаз, къатыны аман джарымаз.
- Къая джолда джортма, ачыкъ сёзден къоркъма.
- Эм ашхы къайын ана мамукъ бла башынгы тешер.
- Оюмсуз атлагъан, аджалсыз ёлюр.
- Иги джашны ышаны – аз сёлешиб, кёб тынгылар.
- Юй кюйдю да, кюйюз чыкъды, ортасындан тюйюш чыкъды.
- Шапа кёб болса, аш татымсыз болур.
- Джангыз торгъай джырламаз.
- Аман хансны – урлугъу кёб.
- Сакъ юйюне сау барыр.
- Къарт айтханны этмеген, къартаймаз.
- Тил – кесген бычакъ, сёз – атылгъан окъ.
- Ёгюзню мюйюзюнден тутадыла, адамны сёзюнден тутадыла.
- Ата – билек, ана – джюрек!
- Башда акъыл болмаса, эки аякъгъа кюч джетер.
- Тау башында, тау болмаз, джангыз терек, бау болмаз.
- Эте билген, этген этеди, эте билмеген, юретген этеди!
- Мени джылытмагъан кюн, меннге тиймесин!
- Адеби болмагъан къыз – тузсуз хант.
- Ашаса, ашамаса да, бёрюню ауузу – къан.
- Окъ къызбайны джокълайды.
- Къарт болгъан джерде, берекет болур, сабий болгъан джерде, оюн болур.
- Тёзгеннге, джабылгъан эшик ачылыр.
- Байлыкъ болгъан джерде, тынчлыкъ джокъду.
- Джарашыу сюйген – джалынчакъ.
- Эки итни арасына сюек атма, эки адамны арасында сёз чыгъарма.
- Билмезни кёзю кёрмез, этмезни къулагъы эшитмез.
- Акъыллы башны – тили къысха.
Профиль
|
|
|
|||