- Ачлыкъда тары гырджын халыуадан татлы.
- Уллу суу бла уллу ауруудан башынгы сакъла.
- Тели турса – той бузар.
- Намысы болмагъанны, сыйы болмаз.
- Тыш элде солтан болгъандан эсе, кесинги элде олтан болгъан игиди!
- Нёгер болсанг, тенг бол, тенг болмасанг, кенг бол.
- Зар адамны насыбы болмаз.
- Ашхы тенг джолгъа салыр, аман тенг джолдан тайдырыр.
- Чомартны къолу берекет.
- Сыфатында болмагъаны, суратында болмаз.
- Сакъалы текени да бар, мыйыгъы киштикни да бар.
- Ишлемеген – тишлемез.
- Гугурук къычырмаса да, тангны атары къалмаз.
- Къарын къуру болса, джюрек уру болур.
- Абынмазлыкъ аякъ джокъ, джангылмазлыкъ джаякъ джокъ.
- Суу ичген шауданынга тюкюрме.
- Ашатыргъа иш – ашхы, ишлетирге аш – ашхы.
- Аман къатын алгъан, арыр, иги къатын алгъан джарыр.
- Ким бла джюрюсенг, аны кёзю бла кёрюнюрсе.
- Тамбла алтындан бюгюн багъыр ашхы.
- Адамны бетине къарама, адетине къара.
- Эринчекни эр алмаз, эр алса да, кёл салмаз, кёл салса да, кёб бармаз!
- Арбаз сайлама да, хоншу сайла.
- Таш ата билмеген, башына урур.
- Эл ауузу – элек, анга ийнаннган – халек.
- Айырылгъанланы айю ашар, бёлюннгенлени бёрю ашар.
- Ат да турмайды бир териде.
- Окъ къызбайны джокълайды.
- Ач къалгъандан, кеч къалгъан къолай.
- Кесине оноу эте билмеген, халкъына да эте билмез.
- Хоншуну тауугъу къаз кёрюнюр, келини къыз кёрюнюр.
- Битмегеннге сакъал – танг.
- Ишни ахырын ойламай, аллын башлама.
- Келинин тута билмеген, къул этер, къызын тута билмеген, тул этер.
- Къайгъы тюбю – тенгиз.
- Зарда марда джокъ.
- Къартны сыйын кёрмеген, къартлыгъында сыйлы болмаз.
- Агъач халкъгъа алтынды, иссиликге салкъынды.
- Биреуге аманлыкъ этиб, кесинге игилик табмазса.
- Ариуну – ауруу кёб.
- Джангызны оту джарыкъ джанмаз!
- Аш кетер да бет къалыр.
- Ариу – кёзге, акъыл – джюрекге.
- Эли джокъну – кёлю джокъ.
- Ач отунчуну ачыуу – бурнунда.
- Къалгъан ишге къар джауар.
- Эки ойлашыб, бир сёлешген.
- Элни кючю – эмеген.
- Кимни – тили, тиши онглу, кимни – къолу, иши онглу.
- Мал тутхан – май джалар.
Профиль
|
|
|
|||