- Ата Джуртуму башы болмасам да, босагъасында ташы болайым.
- Джол бла сёзню къыйыры джокъ.
- Чомартха хар кюн да байрамды.
- Ачны эсинде – аш.
- Окъдан джара эртде-кеч болса да бителир, сёз джара, ёмюрге къалыр.
- Нарт сёз къарт болмаз.
- Рысхы джалгъанды: келген да этер, кетген да этер.
- Кёбге таш атма.
- Ачлыкъда тары гырджын халыуадан татлы.
- Ётюрюкден тюбю джокъ, кёлтюрюрге джиби джокъ.
- Эки элинги тыйсанг, джети элде махталырса.
- Терслик кетер, тюзлюк джетер.
- Чакъырылмагъан къонакъ къачан кетерин сормаз.
- Уллу сёзде уят джокъ.
- Иги адам абынса да, джангылмаз.
- Билмегенинги, билгеннге сор.
- Сабий кёргенин унутмаз.
- Мухар, кеси тойса да, кёзю тоймаз.
- Биреу къой излей, биреу той излей.
- Айырылгъанланы айю ашар, бёлюннгенлени бёрю ашар.
- Джюрекден джюрекге джол барды.
- Ана – юйню кюн джарыгъы.
- Бети къызарыучу адамны, джюреги харам болмаз.
- Тюз сёз баргъан сууну тыяр.
- Биреуню къыйынлыгъы бла кесинге джол ишлеме.
- Ишни аллы бла къууанма да, арты бла къууан.
- Адам къыйынлыгъын кёлтюрюр, зауукълугъун кёлтюрмез.
- Ариу сёз – къылычдан джити.
- Ашха уста, юйюнде болсун
- Кёлю джокъну – джолу джокъ.
- Ёгюзню мюйюзлери ауурлукъ этмейдиле.
- Нёгер болсанг, тенг бол, тенг болмасанг, кенг бол.
- Ургъан суудан башынгы сакъла.
- Ёнгкюч къууана барыр, джылай келир.
- Намыс сатылыб алынмайды.
- Биреуню эскиси биреуге джангы болмайды.
- Накъырда – кертини келечиси.
- Тешик этген тынчды, аны джамагъан къыйынды.
- Къумурсхала джыйылсала, пилни да джыгъадыла.
- Къолу уллу – асыу, аягъы уллу – джарсыу.
- Ариу джол аджал келтирмез.
- Адамны джюреги нени кёрюрге сюйсе, кёзю да аны кёрюрге ёч болады.
- Баланы адам этген анады.
- Сангырау къулакъ эл бузар.
- Бет бетге къараса, бет да джерге къарар.
- Эри аманны, къатыны – аман.
- Окъумагъан сокъурду, сокъур ташха абыныр!
- Тюзню ётмеги тюзде къалса да, тас болмаз.
- Итли къонакъ джарашмаз.
- Махтаннган къыз, тойда джукълар.
Профиль
|
|
|||