- Адам туугъан джеринде, ит тойгъан джеринде.
- Къарын къуру болса, джюрек уру болур.
- Хоншуну тауугъу къаз кёрюнюр, келини къыз кёрюнюр.
- Адеб базарда сатылмаз.
- Байдан умут эте, джарлыдан ёгюз багъасы къорады.
- Адам къаллай бир ишленмесе, аллай бир кесин уллу кёреди.
- Адамны адамлыгъы къыйынлыкъда айгъакъланады.
- Адебни адебсизден юрен.
- Шекер бла туз – бир болмаз, ушамагъан – юй болмаз.
- Урама да – ёледи, сатама да – келеди.
- Юй кюйдю да, кюйюз чыкъды, ортасындан тюйюш чыкъды.
- Бети бедерден, намыс сакълама.
- Кийимни бичсенг, кенг бич, тар этген къыйын тюлдю.
- Джиби бир къат джетмей эди да, эки къат тарта эди.
- Ойнай билмеген, уруб къачар.
- Сёлеш деб шай берген, тохта деб, сом берген.
- Битмегеннге сакъал – танг.
- Чомартны къолун джокълукъ байлар.
- Къошда джокъгъа – юлюш джокъ.
- Айырылгъанланы айю ашар, бёлюннгенлени бёрю ашар.
- Ашына кёре табагъы, балына кёре къалагъы.
- Джылкъыдан – ат чыгъар, тукъумдан – джаш чыгъар.
- Танг атмайма десе да, кюн къоярыкъ тюйюлдю.
- Адамны бетине къарама, адетине къара.
- Адебсиз адам – джюгенсиз ат.
- Алим болгъандан эсе, адам болгъан къыйынды.
- Къыз тиширыу кеси юйюнде да къонакъды.
- Тойгъа барсанг, тоюб бар, эски тонунгу къоюб бар.
- Иги адамны бир сёзю эки болмаз.
- Аууз сакълагъан – джан сакълар.
- Сёз къанатсыз учар.
- Билеги кючлю, бирни джыгъар, билими кючлю, мингни джыгъар.
- Башы ишлегенни, ауузу да ишлер.
- Тойну къарнашы – харс, джырны къарнашы – эжиу.
- Сууда джау джокъ, кёб сёзде магъана джокъ.
- Накъырда – кертини келечиси.
- Ашлыкъны арба юйге келтирир, чана базаргъа элтир.
- Кютгени беш эчки, сызгъыргъаны уа, джерни джарады.
- Къарнынг бла ёч алма.
- Ашыкъгъан cуу, тенгизге джетмез.
- Чыбыкълыкъда бюгюлмеген, къазыкълыкъда бюгюлмей эди.
- Ётюрюкден тюбю джокъ, кёлтюрюрге джиби джокъ.
- Адам сёзюнден белгили.
- Ишленмеген джаш – джюгенсиз ат, ишленмеген къыз – тузсуз хант.
- Джыланны къуйругъундан басарынг келсе, аны башы болгъанын унутма.
- Аджалсыз ёлюм болмаз.
- Чакъырылмагъан къонакъ къачан кетерин сормаз.
- Чомартны къолу берекет.
- Эр сокъур болсун, къатын тилсиз болсун.
- Биреу къой излей, биреу той излей.
Профиль
|
|
|||