- Намысы болмагъанны, сыйы болмаз.
- Таукел адам тау тешер.
- Зар адамны насыбы болмаз.
- Тёрени джагъы джокъ.
- Ауурну тюбю бла, дженгилни башы бла джюрюген.
- Эл ауузу – элия.
- Бермеген къол, алмайды.
- Джауумдан сора, кюн кюйдюрюр, ётюрюкден сора, айыб кюйдюрюр.
- Къаллай салам берсенг, аллай джууаб алырса.
- Чомартха Тейри да борчлуду.
- Чомарт бергенин айтмаз.
- Гыдай эчки суугъа къараб, мюйюзле кёрмесе, джашма алкъын, дегенди.
- Къарыусузгъа кюлме, онгсузгъа тийме.
- Мен да «сен», дейме, сен да «кесим», дейсе.
- Элиб деген, элге болушур.
- Ишлегенден, къарагъан уста.
- Джылыгъа джылан илешир.
- Орундукъ тюбюнде атылсам да, орта джиликме, де да айлан.
- Аман киши кеси юйюнде – къонакъ.
- Джарлыны эшигин махтагъан джабар.
- Башы ишлегенни, ауузу да ишлер.
- Мухардан ач ычхынмаз.
- Къызгъанчдан ычхыныр, мухардан ычхынмаз.
- Бичгенде ашыкъма, тикгенде ашыкъ.
- Билим – акъылны чырагъы.
- Байлыкъ келсе, акъыл кетер.
- Ётюрюкден тюбю джокъ, кёлтюрюрге джиби джокъ.
- Соргъан айыб тюлдю, билмеген айыбды.
- Джарлыны тону джаз битер.
- Мени джылытмагъан кюн, меннге тиймесин!
- Тёзген – тёш ашар!
- Тешигини къатында, чычхан да батыр болур.
- Этим кетсе да, сюегим къалыр.
- Уллу къашыкъ эрин джыртар.
- Тамчы таш тешер.
- Душманны тышы – акъ, ичи – къара.
- Таугъа чыгъаллыкъ эсенг, тюзде къалма.
- Нафысынгы айтханын этме, намысынгы айтханын эт.
- Чёбню кёлтюрсенг, тюбюнден сёз чыгъар.
- Адам туугъан джеринде, ит тойгъан джеринде.
- Ишлемеген – тишлемез.
- Байлыкъ тауусулур, билим тауусулмаз.
- Джыйырма къойну юч джыйырма эбзе кюте эди.
- Керилген да, ургъан кибикди.
- Эр абынмай, эл танымаз.
- Берекет берсин деген джерде, берекет болур.
- Ауузу аманнга «иги», деме.
- Суу кетер, таш къалыр.
- Тулпарлыкъ, билекден тюл – джюрекден.
- Ач къалгъандан, кеч къалгъан къолай.
Профиль
|
|
|||