- Тюз сёз баргъан сууну тыяр.
- Билим насыб берир, билим джолну керир.
- Чакъырылмагъан къонакъ – орунсуз.
- Сыфатында болмагъаны, суратында болмаз.
- Къартны сыйын кёрмеген, къартлыгъында сыйлы болмаз.
- Итли къонакъ джарашмаз.
- Эллинг бла джау болсанг да, юйюнг бла джау болма.
- Бал – татлы, балдан да бала – татлы.
- Кесинге джетмегенни, кёб сёлешме.
- Термилгенинги табмазса, кюлгенинге тюберсе.
- Кёб ант этген, кёб ётюрюк айтыр.
- Мал тутхан – май джалар.
- Мураты болгъанны джюрек тебюую башхады.
- Къуру гыбыт бек дыгъырдар.
- Ашыкъгъанны этеги бутуна чырмалыр.
- Сакъламагъан затынга джолукъсанг, не бек къууанаса, не бек ачыйса.
- Къыз чыгъаргъан – къызыл къымжа.
- Ач уят къоймаз.
- Къартны бурнун сюрт да, оноугъа тут.
- Къар – келтирди, суу – элтди.
- Джаш къарыу бла кючлю, къарт акъыл бла кючлю.
- Ач къалгъандан, кеч къалгъан къолай.
- Дженгил джетерикме деб, узун джолну къоюб, къысхасын барма.
- Джашда акъыл джокъ, къартда къарыу джокъ.
- Джарлыны тону джаз битер.
- Оюмсуз атлагъан, аджалсыз ёлюр.
- Адеб джокъда, намыс джокъ.
- Джаш болсун, къыз болсун, акъылы, саны тюз болсун.
- Ушамагъан – джукъмаз.
- Сакъалы текени да бар, мыйыгъы киштикни да бар.
- Къарт болгъан джерде, берекет болур, сабий болгъан джерде, оюн болур.
- Танг атмайма десе да, кюн къоярыкъ тюйюлдю.
- Адебни адебсизден юрен.
- Адамны артындан къара сабан сюрме.
- Уллу къашыкъ эрин джыртар.
- Ашын ашагъанынгы, башын да сыйла.
- Тил бла келеди джыр да.
- Зар адам ашынгы ашар, кесинги сатар.
- Къызын тута билмеген, тул этер, джашын тута билмеген, къул этер.
- Тёгюлген тюгел джыйылмайды.
- Къатын къылыкъсыз, эр тынчлыкъсыз.
- Байлыкъ келсе, акъыл кетер.
- Чомарт къолда мал къалмаз.
- От кюйдюрген, сау болса да, тот кюйдюрген, сау болмаз.
- Джахил болса анасы, не билликди баласы?
- Кийиминг бла танылма, адамлыкъ бла таныл.
- Кенгеш болса, уруш болмаз.
- Башсыз урчукъ тюзюне айланмаз.
- Къарнынг бла ёч алма.
- Джашлыкъ этмеген, башлыкъ этмез.
Профиль
|
|
|||