- Окъ къызбайны джокълайды.
- Аман адам элни бир-бирине джау этер.
- Ашда уялгъан – мухар, ишде уялгъан – хомух.
- Терслик кетер, тюзлюк джетер.
- Чабакъсыз кёлге къармакъ салгъанлыкъгъа, чабакъ тутмазса.
- Чомарт джарлы болмаз.
- Къайгъыны сюйген, къайгъы табар.
- Эринчекни эр алмаз, эр алса да, кёл салмаз, кёл салса да, кёб бармаз!
- Сангырау къулакъ эл бузар.
- Адебсиз адам – джюгенсиз ат.
- Азыкълы ат арымаз, къатыны аман джарымаз.
- Джан саулукъ бермей, сан саулукъ бермезсе.
- Окъугъанны бети джарыкъ.
- Аман киши кеси юйюнде – къонакъ.
- Ашхылыкъ джерде джатмайды, аманлыкъ суугъа батмайды.
- Башсыз урчукъ тюзюне айланмаз.
- Ишленмеклик адамлыкъды.
- Тойгъан джерден туугъан джер игиди.
- Акъыллы айтыр эди, акъылсыз къоймайды.
- Уясында не кёрсе, учханында аны этер.
- Татлы сёз – балдан татлы.
- Адамны бетине къарама, адетине къара.
- Эринчекни аурууу – кёб.
- Ариу джол аджал келтирмез.
- Кюн кёрмеген, кюн кёрсе, кюндюз чыракъ джандырыр.
- Сыфатында болмагъаны, суратында болмаз.
- Джети тилни билген джети кишиди.
- Ёпкелегенни ашы татлы болады.
- Ата – баланы уясы.
- Биреуню тёрюнден, кесинги эшик артынг игиди.
- Къатын къылыкъсыз, эр тынчлыкъсыз.
- Джангыз терек къынгыр ёсер.
- Акъыллы – эл иеси, тели – эл баласы.
- Хунаны тюбюн къазсанг, юсюнге ауар.
- Келгинчи, къонакъ уялыр, келгенден сора, къонакъбай уялыр.
- Байлыкъ келсе, акъыл кетер.
- Таукел тауну аудурур.
- Аш хазыр болса, иш харам болур.
- Борчунг бар эсе, хурджунунга ойлаб узал.
- Акъыл бла адеб эгизледиле.
- Сакъалы текени да бар, мыйыгъы киштикни да бар.
- Арбаз сайлама да, хоншу сайла.
- Джашны джигитлиги сорулур, къызны джигерлиги сорулур.
- Айырылгъанланы айю ашар, бёлюннгенлени бёрю ашар.
- Иги – алгъыш этер, аман – къаргъыш этер.
- Тёгюлген тюгел джыйылмайды.
- Бир онгсуз адам адет чыгъарды, деб эштирик тюлсе.
- Аманнга алтын чыдамаз.
- Къан бла кирген, джан бла чыгъар.
- Киштикге къанат битсе, чыпчыкъ къалмаз эди.
Ошибка!
Для просмотра темы введите ваши логин и пароль.Пожалуйста, авторизуйтесь: