- Насыблы элин сюер, насыбсыз кесин сюер.
- Мал ёлсе, сюек къалыр, адам ёлсе, иши къалыр.
- Ёксюзню тилеги къабыл болур.
- Керилген да, ургъан кибикди.
- Ёксюзню къалачы уллу кёрюнюр.
- Адам туугъан джеринде, ит тойгъан джеринде.
- Адеб джокъда, намыс джокъ.
- Ариу сёз аурууунгу алыр.
- Ач уят къоймаз.
- Тойну къарнашы – харс, джырны къарнашы – эжиу.
- Кёзюнде тереги болгъан, чёбю болгъаннга кюле эди.
- Чакъырылмагъан къонакъ – орунсуз.
- Ёзденликни кёбю ётюрюк.
- Харам къарнашдан, халал тенг ашхы.
- Окъ къызбайны джокълайды.
- Ана кёлю – балада, бала кёлю – талада.
- Тенгни тенглиги джашай барсанг билинир.
- Ёлген аслан – сау чычхан.
- Эллинг бла джау болсанг да, юйюнг бла джау болма.
- Ишни ахырын ойламай, аллын башлама.
- Къызгъанчдан ычхыныр, мухардан ычхынмаз.
- Мадар болса, къадар болур.
- Ишленмеклик адамлыкъды.
- Акъыл бла адеб эгизледиле.
- Келлик заман – къартлыкъ келтирир, кетген заман – джашлыкъ ёлтюрюр.
- Тойгъандан сора, ашны сёкме.
- Ауурну тюбю бла, дженгилни башы бла джюрюген.
- Намысы джокъну – дуниясы джокъ.
- Джашда акъыл джокъ, къартда къарыу джокъ.
- Аджаллыгъа окъсуз шкок атылыр.
- Нафысынгы айтханын этме, намысынгы айтханын эт.
- Ат да турмайды бир териде.
- Кёпюр салгъан кеси ётер, уру къазгъан кеси кетер.
- Туз, гырджын аша, тюзлюк бла джаша.
- Мени джылытмагъан кюн, меннге тиймесин!
- Тели турса – той бузар.
- Эринчекни аурууу – кёб.
- Аманнга игилик этсенг, юйюнге сау бармазса.
- Башы ишлегенни, ауузу да ишлер.
- Тил – кесген бычакъ, сёз – атылгъан окъ.
- Джауумдан сора, кюн кюйдюрюр, ётюрюкден сора, айыб кюйдюрюр.
- Нарт сёз – тилни бети.
- Айран ичген – къутулду, джугъусун джалагъан – тутулду.
- Босагъа таш юйге кирмей эди, тыбыр таш эшикге чыкъмай эди.
- Шапа кёб болса, аш татымсыз болур.
- Тил джюрекге джол ишлейди.
- Накъырда – кертини келечиси.
- Къарны аманнга къазан такъдырма, къолу аманнга от джакъдырма.
- Ач – эснер, ат – кишнер.
- Эки ойлашыб, бир сёлешген.
Ошибка!
Для просмотра темы введите ваши логин и пароль.Пожалуйста, авторизуйтесь: