- Соргъан айыб тюлдю, билмеген айыбды.
- Уллу къазанда бишген эт, чий къалмаз.
- Хазыр ашха – терен къашыкъ.
- Джаш къарыу бла кючлю, къарт акъыл бла кючлю.
- Сибиртки да сыйлы болду, кюрек да кюнлю болду.
- «Ёгюз, джаргъа джууукъ барма, меннге джюк боллукъса», - дегенди эшек.
- Этек чакъмакълары баш джаргъан, сёлешген сёзлери таш джаргъан.
- Юй кюйдю да, кюйюз чыкъды, ортасындан тюйюш чыкъды.
- Ёлген аслан – сау чычхан.
- Къошда джокъгъа – юлюш джокъ.
- Ач уят къоймаз.
- Мухарны эси – ашарыкъда.
- Туз, гырджын аша, тюзлюк бла джаша.
- Ёнгкюч къууана барыр, джылай келир.
- Халкъны юйю – туугъан джери.
- Тойгъан джерден туугъан джер игиди.
- Арыгъан къош чамчы болур.
- Таш ата билмеген, башына урур.
- Сакъ юйюне сау барыр.
- Къарыусузгъа кюлме, онгсузгъа тийме.
- Ата Джуртуму башы болмасам да, босагъасында ташы болайым.
- Биреуню эскиси биреуге джангы болмайды.
- Къолунгдан къуймакъ ашатсанг да, атаны борчундан къутулмазса.
- Онгсузну – джакъла, тенгликни – сакъла.
- Кёзню ачылгъаны – иги, ауузну джабылгъаны – иги.
- Бети къызарыучу адамны, джюреги харам болмаз.
- Айыбны суу бла джууалмазса.
- Джуртун къоругъан озар.
- Кирсизни – саны таза, халалны – къаны таза.
- Ат да турмайды бир териде.
- Къарны аманнга къазан такъдырма, къолу аманнга от джакъдырма.
- Джылар джаш, атасыны сакъалы бла ойнар.
- Аш хазыр болса, иш харам болур.
- Баш болса, бёрк табылыр.
- Кёзю сокъурдан – къоркъма, кёлю сокъурдан – къоркъ.
- Бал ашаргъа сюе эсенг, чибин ургъаннга тёз.
- Тюз сёз баргъан сууну тыяр.
- Дженгил джетерикме деб, узун джолну къоюб, къысхасын барма.
- Кёб джашагъан – кёб билир.
- Иши джокъну, сыйы джокъ.
- Сабыр джетер муратха, сабырсыз къалыр уятха.
- Ишлемеген – тишлемез.
- Кесинг сынамагъан затны, адамгъа буюрма.
- Ашарыкъда сайлагъаннга – чий гырджын.
- Минг тенг да азды, бир джау да кёбдю.
- Тюзлюк тас болмайды.
- Тыш элде солтан болгъандан эсе, кесинги элде олтан болгъан игиди!
- Адамны сыфатына къарама, сёзюне къара.
- Ач да бол, токъ да бол – намысынга бек бол.
- Чомарт къолда мал къалмаз.
Ошибка!
Для просмотра темы введите ваши логин и пароль.Пожалуйста, авторизуйтесь: