- Сагъышы джокъ – джукъучу, акъылы джокъ – къаугъачы.
- Джырчы джырчыгъа – къарнаш.
- Aдам боллукъ, сыфатындан белгили.
- Орну джокъну – сыйы джокъ.
- Кийимни бичсенг, кенг бич, тар этген къыйын тюлдю.
- Халкъны юйю – туугъан джери.
- Къарт болгъан джерде, берекет болур, сабий болгъан джерде, оюн болур.
- Уллу айтханны этмеген – уллаймаз.
- Термилгенинги табмазса, кюлгенинге тюберсе.
- Сескекли кесин билдирир.
- Ургъан суудан башынгы сакъла.
- Эрни эр этерик да, къара джер этерик да, тиширыуду.
- Тюкюрюк баш джармаз, налат кёз чыгъармаз!
- Сёз сёзню айтдырыр.
- Аш иеси бла татлыды.
- Аманны тукъумуна къарама, игини тукъумун сорма.
- Элиб деген, элге болушур.
- Биреу къой излей, биреу той излей.
- Мал тутхан – май джалар.
- Джаным-тиним – окъуу, билим.
- Аш берме да, къаш бер.
- Байлыкъ келсе, акъыл кетер.
- Мухар, кеси тойса да, кёзю тоймаз.
- Арпа, будай – ащды, алтын, кюмюш а – ташды.
- Кёб ант этген, кёб ётюрюк айтыр.
- Тенгинг джокъ эсе – изле, бар эсе – сакъла!
- Джарлыны тону джаз битер.
- Ач, тоймам, дейди, тойгъан, ач болмам, дейди.
- Арба аугъандан сора, джол кёргюзтюучю кёб болур.
- Суугъа – чабакъ, къаягъа – ыргъакъ.
- Чабакъгъа акъыл, табагъа тюшсе келеди.
- Тенгни тенглиги джашай барсанг билинир.
- Джаш къарыу бла кючлю, къарт акъыл бла кючлю.
- Къарнынг тойгъунчу аша да, белинг талгъынчы ишле.
- Билген билмегенни юретген адетди.
- Хата – гитчеден.
- Соргъан айыб тюлдю, билмеген айыбды.
- Чабакъ башындан чирийди.
- Окъумагъан сокъурду, сокъур ташха абыныр!
- Таукелге нюр джауар.
- Хар ишни да аллы къыйынды.
- Ачыу алгъа келсе, акъыл артха къалады.
- Ёгюзню мюйюзлери ауурлукъ этмейдиле.
- Тау башында, тау болмаз, джангыз терек, бау болмаз.
- Рысхы – сют юсюнде кёмюк кибикди.
- Кёб къычыргъандан – къоркъма, тынч олтургъандан – къоркъ.
- Чыкълы кюнде чыкъмагъан, чыкъса къуру кирмеген.
- Чомарт къолда мал къалмаз.
- Къарны аманнга къазан такъдырма, къолу аманнга от джакъдырма.
- Тамырсыз терекге таянма – джыгъылырса.
Ошибка!
Для просмотра темы введите ваши логин и пароль.Пожалуйста, авторизуйтесь: