- Кёпюр салгъан кеси ётер, уру къазгъан кеси кетер.
- Сагъышы джокъ – джукъучу, акъылы джокъ – къаугъачы.
- Кёкдеги болмаса, джердегин кёрмейди.
- Айтхан сёзюне табылгъан.
- Эрине къаргъыш этген къатын, эрнин къабар.
- Джылкъыдан – ат чыгъар, тукъумдан – джаш чыгъар.
- Аманнга игилик этсенг, юйюнге сау бармазса.
- Алгъанда – джууукъ, бергенде – джау.
- Тил бла келеди джыр да.
- Тамчы таш тешер.
- Битмегеннге сакъал – танг.
- Гырджын – тепсини тамадасы.
- Тенгни тенглиги джашай барсанг билинир.
- Къуллукъчума, деб махтанма, къуллукъ – хаух джамчыды!
- Билим къая тешер.
- Аурууну келиую тынч, кетиую – къыйын.
- Байдан умут эте, джарлыдан ёгюз багъасы къорады.
- Тас болгъан бычакъны сабы – алтын.
- Къызгъанчдан ычхыныр, мухардан ычхынмаз.
- Тиширыусуз юй – отсуз от джагъа.
- Тойгъа барсанг, тоюб бар, эски тонунгу къоюб бар.
- Къозулугъунда тоймагъан, къойлугъунда тоймаз.
- Тёзген – тёш ашар!
- Биреуге аманлыкъны тилеме да, кесинге ашхылыкъны тиле.
- Кёбге таш атма.
- Аджаллыгъа окъсуз шкок атылыр.
- Кёб ант этген, кёб ётюрюк айтыр.
- Аман адам элни бир-бирине джау этер.
- Аджашхан тёгерек айланыр.
- Аман къатын алгъан, арыр, иги къатын алгъан джарыр.
- Бал ашаргъа сюе эсенг, чибин ургъаннга тёз.
- Таугъа чыгъаллыкъ эсенг, тюзде къалма.
- Аманнга да, игиге да оноусуз къатышма.
- Эринчекни эр алмаз, эр алса да, кёл салмаз, кёл салса да, кёб бармаз!
- Ач бёрюге мекям джокъ.
- Бетинги сатма, малынгы сат.
- Иши джокъну, сыйы джокъ.
- Чабар ат – джетген къыз.
- Акъыллы айтыр эди, акъылсыз къоймайды.
- Гитче джилтин уллу элни джандырыр.
- Кирсизни – саны таза, халалны – къаны таза.
- Кёлю джокъну – джолу джокъ.
- Эки элинги тыйсанг, джети элде махталырса.
- Джеринден айырылгъан – джети джылар, джуртундан айырылгъан – ёлгюнчю джылар.
- Аллахха ийнаннган кишини, Аллах онгдурур ишин.
- Къолунгдан къуймакъ ашатсанг да, атаны борчундан къутулмазса.
- Джарашыу сюйген – джалынчакъ.
- Джауумдан сора, кюн кюйдюрюр, ётюрюкден сора, айыб кюйдюрюр.
- Билими азны – ауузунда кирит.
- Ётюрюкню къуйругъу – бир тутум.
Ошибка!
Для просмотра темы введите ваши логин и пароль.Пожалуйста, авторизуйтесь: