- От этилмеген джерден тютюн чыкъмайды.
- Адам туугъан джеринде, ит тойгъан джеринде.
- Билген билмегенни юретген адетди.
- Окъумагъан сокъурду, сокъур ташха абыныр!
- Къазанда болса, чолпугъа чыгъар.
- Адам къаллай бир ишленмесе, аллай бир кесин уллу кёреди.
- Кесине оноу эте билмеген, халкъына да эте билмез.
- Гугук кесини атын айтыб къычыргъанча, мен, мен деб нек тураса?
- Кюн – узун, ёмюр – къысха.
- Ётюрюкню башын керти кесер.
- Накъырданы арты керти болур.
- Ёлюк кебинсиз къалмаз.
- Мал кёб болса, джууукъ кёб болур.
- Сакъалы текени да бар, мыйыгъы киштикни да бар.
- Терслик кетер, тюзлюк джетер.
- Къарнынг ауруса, ауузунгу тый
- Ариу сёз джыланны орнундан чыгъарыр.
- Малны кют, джерни тюрт.
- Хар зат кесини орнуна иги.
- Окъугъан озар, окъумагъан тозар.
- Эм уллу байлыкъ – джан саулукъ.
- Кёб ант этген, кёб ётюрюк айтыр.
- Иши джокъну, сыйы джокъ.
- Оюмсуз атлагъан, аджалсыз ёлюр.
- Ёгюзню мюйюзюнден тутадыла, адамны сёзюнден тутадыла.
- Сютню башын джалагъан къутулур, тюбюн ичген тутулур.
- Эркишиге тары кебек танг кёрюнюр.
- Ашда уялгъан – мухар, ишде уялгъан – хомух.
- Башы ишлегенни, ауузу да ишлер.
- Аманнга да, игиге да оноусуз къатышма.
- Джангыз торгъай джырламаз.
- Иги джашны ышаны – аз сёлешиб, кёб тынгылар.
- Бети – къучакълар, джюреги – бычакълар.
- Ёксюзню тилеги къабыл болур.
- Мухар, кеси тойса да, кёзю тоймаз.
- Джолунга кёре – джюрюшюнг, джагъанга кёре – юлюшюнг.
- Ханы къызы буюгъа-буюгъа киштик болду.
- Аман къатын алгъан, арыр, иги къатын алгъан джарыр.
- Сормай – алма, чакъырылмай – барма.
- Хунаны тюбюн къазсанг, юсюнге ауар.
- Аджалсыз ёлюм болмаз.
- Тай асырагъан, атха минер.
- Эм ашхы къайын ана мамукъ бла башынгы тешер.
- Аурууну келиую тынч, кетиую – къыйын.
- Джаш болсун, къыз болсун, акъылы, саны тюз болсун.
- Эртде тургъан бла эртде юйленнген сокъуранмаз.
- Ач къарным, тынч къулагъым.
- Кёл – къызбай, къол – батыр.
- Этни да ашады, бетни да ашады.
- Экеулен сёлеше тура эселе, орталарына барыб кирме.
Ошибка!
Для просмотра темы введите ваши логин и пароль.Пожалуйста, авторизуйтесь: