- Минг тенг да азды, бир джау да кёбдю.
- Айранын берсенг, челегин да къызгъанма.
- Акъыллы айтыр эди, акъылсыз къоймайды.
- Билген билмегенни юретген адетди.
- Биреуню тёрюнден, кесинги эшик артынг игиди.
- Мураты болгъанны джюрек тебюую башхады.
- Билеги кючлю, бирни джыгъар, билими кючлю, мингни джыгъар.
- Хар адамгъа кеси миннген тау кибик.
- Аманнга алтын чыдамаз.
- Байлыкъ келсе, акъыл кетер.
- Кирсизни – саны таза, халалны – къаны таза.
- Огъурлуну сёзю – суу, огъурсузну сёзю – уу.
- Иги сёз – джаннга азыкъ, аман сёз башха – къазыкъ.
- Ёлген ийнек сютлю болур.
- Чомартны къолун джокълукъ байлар.
- Ач – эснер, ат – кишнер.
- Накъырданы арты керти болур.
- Ауругъаннга – кийик саулукъ, джетген къызгъа – чилле джаулукъ.
- Биреуге аманлыкъны тилеме да, кесинге ашхылыкъны тиле.
- Сибиртки да сыйлы болду, кюрек да кюнлю болду.
- Къонагъынгы артмагъын алма да, алгъышын ал.
- Ишин билген, аны сыйын чыгъарады.
- Къая джолда джортма, ачыкъ сёзден къоркъма.
- Къарны аманнга къазан такъдырма, къолу аманнга от джакъдырма.
- Къарнынг тойгъунчу аша да, белинг талгъынчы ишле.
- Азыгъы аз, алгъа къабар, аты аман, алгъа чабар.
- Суугъа – таянма, джаугъа – ийнанма.
- Ургъан суудан башынгы сакъла.
- Аш хазыр болса, иш харам болур.
- Хатерли къул болур.
- Терслик кетер, тюзлюк джетер.
- Мадар болса, къадар болур.
- Биреуню эскиси биреуге джангы болмайды.
- Сагъышы джокъ – джукъучу, акъылы джокъ – къаугъачы.
- Мухар, кеси тойса да, кёзю тоймаз.
- Аууздан келген, къолдан келсе, ким да патчах болур эди.
- Ана къолу ачытмаз.
- Арпа, будай – ащды, алтын, кюмюш а – ташды.
- Къазанчы аман болса, къазаны къайнамаз.
- Керилген да, ургъан кибикди.
- Халкъны джырын джырласанг, халкъ санга эжиу этер.
- Ишни аллы бла къууанма да, арты бла къууан.
- Тик ёргени, тик энгишгеси да болады.
- Экеу тутушса, биреу джыгъылыр.
- Ачны эсинде – аш.
- Къарт айтханны этмеген, къартаймаз.
- Байлыкъ болгъан джерде, тынчлыкъ джокъду.
- Таула не мийик болсала да, аууш табылыр.
- Ашда уялгъан – мухар, ишде уялгъан – хомух.
- Адебни адебсизден юрен.
Ошибка!
Для просмотра темы введите ваши логин и пароль.Пожалуйста, авторизуйтесь: