- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Эл тойса, тоймагъан, эл къойса, къоймагъан.
- Агъач халкъгъа алтынды, иссиликге салкъынды.
- Соргъан айыб тюлдю, билмеген айыбды.
- Адебсиз адам – джюгенсиз ат.
- Суу да къайтады чыкъгъан джерине.
- Сютден ауузу кюйген, суугъа юфгюре эди.
- Алгъанда – джууукъ, бергенде – джау.
- Ачыу алгъа келсе, акъыл артха къалады.
- Тилсиз миллет джокъ болур.
- Келгинчи, къонакъ уялыр, келгенден сора, къонакъбай уялыр.
- Дууулдаса – бал чибин, къонса – къара чибин.
- Махтаннган къыз, тойда джукълар.
- Алтыннга тот къонмаз.
- Хунаны тюбюн къазсанг, юсюнге ауар.
- Артына баргъанны, къатына барма.
- Оюмсуз атлагъан, аджалсыз ёлюр.
- Ётген ёмюр – акъгъан суу.
- Джуртун къоругъан озар.
- Ана – юйню кюн джарыгъы.
- Мени джылытмагъан кюн, меннге тиймесин!
- Таугъа чыгъаллыкъ эсенг, тюзде къалма.
- Босагъа таш юйге кирмей эди, тыбыр таш эшикге чыкъмай эди.
- Джаш болсун, къыз болсун, акъылы, саны тюз болсун.
- Ёксюзню къалачы уллу кёрюнюр.
- Адеб базарда сатылмаз.
- Айран тёгюлсе, джугъусу къалыр.
- Кёз – сюйген джерде, къол – ауругъан джерде.
- Игиге айтсанг – билир, аманнга айтсанг – кюлюр.
- Сакъламагъан затынга джолукъсанг, не бек къууанаса, не бек ачыйса.
- Билим насыб берир, билим джолну керир.
- Ата Джуртун танымагъан, атасын да танымаз.
- Джыгъылгъанны сырты джерден тоймаз.
- Къуллукъчума, деб махтанма, къуллукъ – хаух джамчыды!
- Адамны адамлыгъы къыйынлыкъда айгъакъланады.
- Къан бла кирген, джан бла чыгъар.
- Ач отунчуну ачыуу – бурнунда.
- Кийиминг бла танылма, адамлыкъ бла таныл.
- Бозаны арты дауур болур.
- Акъыл сабырлыкъ берир.
- Джылар джаш, атасыны сакъалы бла ойнар.
- Биреуге аманлыкъ этиб, кесинге игилик табмазса.
- Эрине къаргъыш этген къатын, эрнин къабар.
- Аман хансны – урлугъу кёб.
- Ёксюзню тилеги къабыл болур.
- Тойгъанлыкъ къойгъа джарашады.
- Окъугъан озар, окъумагъан тозар.
- Бети бедерден, намыс сакълама.
- Таула не мийик болсала да, аууш табылыр.
- Эркиши – от, тиширыу – суу.
Ошибка!
Для просмотра темы введите ваши логин и пароль.Пожалуйста, авторизуйтесь: