- Джарлыны эшигин махтагъан джабар.
- Къалгъан ишге къар джауар.
- Ишленмеклик адамлыкъды.
- Ашыкъгъанны этеги бутуна чырмалыр.
- Бозанг болмагъан джерге, къалагъынгы сукъма.
- Мураты болгъанны джюрек тебюую башхады.
- Баш болса, бёрк табылыр.
- Къанны къан бла джуума, аманны аман бла къуума.
- Аурууну келиую тынч, кетиую – къыйын.
- Къарны аманнга къазан такъдырма, къолу аманнга от джакъдырма.
- Адам туугъан джеринде, ит тойгъан джеринде.
- Ашаса, ашамаса да, бёрюню ауузу – къан.
- Хатерли къул болур.
- Хунаны тюбюн къазсанг, юсюнге ауар.
- Ашарыкъда сайлагъаннга – чий гырджын.
- Адамны джюреги нени кёрюрге сюйсе, кёзю да аны кёрюрге ёч болады.
- Сибиртки да сыйлы болду, кюрек да кюнлю болду.
- Акъыллы айтыр эди, акъылсыз къоймайды.
- Кёкдеги болмаса, джердегин кёрмейди.
- Адамны сабийин сюйген джюреги, бычакъча, джитиди.
- Байлыкъ келсе, акъыл кетер.
- Татлы тилде – сёз ариу, чемер къолда – иш ариу.
- Къыз чыгъаргъан – къызыл къымжа.
- Келинни – келгинчи, бёркню кийгинчи кёр.
- Тил – кесген бычакъ, сёз – атылгъан окъ.
- Джаз бир кюнню джатсанг, къыш талай кюнню абынырса.
- Аллахдан тилесенг, кёб тиле.
- Экиндини кеч къылсанг, чабыб джетер ашхам.
- Ашатыргъа иш – ашхы, ишлетирге аш – ашхы.
- Джыйырма къойну юч джыйырма эбзе кюте эди.
- Сабыр джетер муратха, сабырсыз къалыр уятха.
- Мени джылытмагъан кюн, меннге тиймесин!
- Арпа, будай – ащды, алтын, кюмюш а – ташды.
- Эринчекни аурууу – кёб.
- Къазанда болса, чолпугъа чыгъар.
- Эркишиге тары кебек танг кёрюнюр.
- Тили узунну, намысы – къысха.
- Кёпюр салгъан кеси ётер, уру къазгъан кеси кетер.
- Иги болса, тамадама – махтау, аман болса, меннге – айыб.
- Эски джаугъа ышанма.
- Окъугъан озар, окъумагъан тозар.
- Аман киши кеси юйюнде – къонакъ.
- Акъыл аздырмаз, билим тоздурмаз.
- Байны оноуу, джарлыгъа джарамаз.
- Уллу суу бла уллу ауруудан башынгы сакъла.
- Эртде тургъан джылкъычыны эркек аты тай табар.
- Уллу къашыкъ эрин джыртар.
- Ишлерге уял да, ашаргъа табма.
- Бастасын ашагъан, хантусун да ичер.
- Керти сёзге тёре джокъ.
Ошибка!
Для просмотра темы введите ваши логин и пароль.Пожалуйста, авторизуйтесь: