- Хата – гитчеден.
- Таугъа чыгъаллыкъ эсенг, тюзде къалма.
- Айтхан сёзюне табылгъан.
- Чакъырылмагъан къонакъ тёрге атламаз.
- Эртде тургъан бла эртде юйленнген сокъуранмаз.
- Адам сёзге тынгыла, акъыл сёзню ангыла.
- Тилчи тилден къаныкъмаз.
- Ата Джуртча джер болмаз, туугъан элча эл болмаз.
- Ёксюзню къалачы уллу кёрюнюр.
- Сабий болмагъан джерде, мёлек болмаз.
- Босагъа таш юйге кирмей эди, тыбыр таш эшикге чыкъмай эди.
- Бек анасы джыламаз.
- Арбаз сайлама да, хоншу сайла.
- Окъугъанны бети джарыкъ.
- Къарыусузгъа кюлме, онгсузгъа тийме.
- Нёгерсизни джолу узун.
- Ётюрюк хапар аякъ тюбю бла джюрюйдю.
- Айырылмаз джууугъунга, унутмаз сёзню айтма.
- Акъылсызны джууукъгъа алма, акъыллыны кенгнге салма.
- Телини эшигин, махтау джабар.
- Билим – акъылны чырагъы.
- Накъырда – кертини келечиси.
- Элге къуллукъ этмеген, элге ие болмаз.
- Сагъыш – къартлыкъгъа сюйюмчю.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Къарнынг бла ёч алма.
- Джашда акъыл джокъ, къартда къарыу джокъ.
- Кийимни бичсенг, кенг бич, тар этген къыйын тюлдю.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Эринчекге кюн узун.
- Къонакъ кёб келюучю юйню, къазаны отдан тюшмез.
- Джюрекге ариу – кёзге да ариу.
- Бермеген къол, алмайды.
- Къызын тута билмеген, тул этер, джашын тута билмеген, къул этер.
- Мухардан ач ычхынмаз.
- Таш ата билмеген, башына урур.
- Урунуу – насыбны анасы.
- Ата – билек, ана – джюрек!
- Ач уят къоймаз.
- Ашыкъгъан cуу, тенгизге джетмез.
- Тилде сюек болмаса да, сюек сындырыр.
- Къралынгы – душмандан, башынгы от бла суудан сакъла.
- Ханнга да келеди хариблик.
- Ачны эсинде – аш.
- Аууз сакълагъан – джан сакълар.
- Иги сеники эсе да, сюйген кесимикин этеме.
- Садакъачыны джаны – къапчыгъында.
- Биреуге аманлыкъны тилеме да, кесинге ашхылыкъны тиле.
- Кюл тюбюндеги от кёрюнмейди.
- Акъыл неден да кючлюдю.
Ошибка!
Для просмотра темы введите ваши логин и пароль.Пожалуйста, авторизуйтесь: