- Игини сыйлагъан адетди.
- Аман хансны – урлугъу кёб.
- Ишге юренсин къоллары, халкъ бла болсун джоллары.
- Накъырданы арты керти болур.
- Джаханимни кёрмей, джандетге кёл салмазса.
- Аман адам элни бир-бирине джау этер.
- Тили узунну, намысы – къысха.
- Адам туугъан джеринде, ит тойгъан джеринде.
- Эр сокъур болсун, къатын тилсиз болсун.
- Къарын къуру болса, джюрек уру болур.
- Уллу суу бла уллу ауруудан башынгы сакъла.
- Асхат ашлыкъ сата, юйдегиси ачдан къата.
- Тойну къарнашы – харс, джырны къарнашы – эжиу.
- Танг атмайма десе да, кюн къоярыкъ тюйюлдю.
- Чомартны къолу берекет.
- Айыбны суу бла джууалмазса.
- Уллу сёлешме да, уллу къаб.
- Къыз келсе, джумуш эте келеди, къатын келсе, ушакъ эте келеди.
- Баш болса, бёрк табылыр.
- Эшекге миннген – биринчи айыб, андан джыгъылгъан – экинчи айыб.
- Чабакъгъа акъыл, табагъа тюшсе келеди.
- Ётюрюк хапар аякъ тюбю бла джюрюйдю.
- Къарнынг бла ёч алма.
- Келгинчи, къонакъ уялыр, келгенден сора, къонакъбай уялыр.
- Адебни адебсизден юрен.
- Ёгюзню мюйюзлери ауурлукъ этмейдиле.
- Иги джашны ышаны – аз сёлешиб, кёб тынгылар.
- Ауругъанны сау билмез, ач къарынны токъ билмез.
- Шапа кёб болса, аш татымсыз болур.
- Ишни аллы бла къууанма да, арты бла къууан.
- Тюзню ётмеги тюзде къалса да, тас болмаз.
- От этилмеген джерден тютюн чыкъмайды.
- От кюйдюрген, сау болса да, тот кюйдюрген, сау болмаз.
- Аман къатын алгъан, арыр, иги къатын алгъан джарыр.
- Уллу атлама – абынырса, уллу къабма – къарылырса.
- Итли къонакъ джарашмаз.
- Дуния мал дунияда къалады.
- Джан саулукъ бермей, сан саулукъ бермезсе.
- Мени джылытмагъан кюн, меннге тиймесин!
- Хазыр ашха – терен къашыкъ.
- Тойгъан джерге джети къайт.
- Билим – акъылны чырагъы.
- Мухарны эси – ашарыкъда.
- Кёз – сюйген джерде, къол – ауругъан джерде.
- Элде адам къалмаса, ит тахтагъа минер.
- Джарашыу сюйген – джалынчакъ.
- Айтылгъан сёз ызына къайтмаз.
- Суу кетер, таш къалыр.
- Ариу сёз – къылычдан джити.
- Къан бла кирген, джан бла чыгъар.
Ошибка!
Для просмотра темы введите ваши логин и пароль.Пожалуйста, авторизуйтесь: