- Элге къуллукъ этмеген, элге ие болмаз.
- Адамны сабийин сюйген джюреги, бычакъча, джитиди.
- Уллу къазанда бишген эт, чий къалмаз.
- Къызны минг тилер, бир алыр.
- Айырылмаз джууугъунга, унутмаз сёзню айтма.
- Джауумдан сора, кюн кюйдюрюр, ётюрюкден сора, айыб кюйдюрюр.
- От кюйдюрген, сау болса да, тот кюйдюрген, сау болмаз.
- Башынга джетмегенни сорма.
- Джети тилни билген джети кишиди.
- Тура эдим джата, къайдан чыкъды хата?
- Ашлыкъны арба юйге келтирир, чана базаргъа элтир.
- Ёзденликни джайгъан – джокълукъ.
- Аманнга алтын чыдамаз.
- Суу кетер, таш къалыр.
- Билим ат болуб да чабар, къуш болуб да учар.
- Тилчи бир сагъатха айлыкъ хата этер.
- Кийиминг бла танылма, адамлыкъ бла таныл.
- Агъач халкъгъа алтынды, иссиликге салкъынды.
- Башы ишлегенни, ауузу да ишлер.
- Къар – келтирди, суу – элтди.
- Ашыкъгъанны этеги бутуна чырмалыр.
- Къанны къан бла джуума, аманны аман бла къуума.
- Джол бла сёзню къыйыры джокъ.
- Эркиши – от, тиширыу – суу.
- Ашхылыкъ джерде джатмайды, аманлыкъ суугъа батмайды.
- Бет бетге къараса, бет да джерге къарар.
- Таукел тауну аудурур.
- Уллу атлама – абынырса, уллу къабма – къарылырса.
- Биреу ашаб къутулур, биреу джалаб тутулур.
- Хаухну атма, ёнгкючню сатма.
- Башы джабылгъан челекге, кир тюшмез.
- Хунаны тюбюн къазсанг, юсюнге ауар.
- Байлыкъ адамны сокъур этер.
- Ишленмеген джаш – джюгенсиз ат, ишленмеген къыз – тузсуз хант.
- Кёлсюзден сёзсюз тууар.
- Аджалсыз ёлюм болмаз.
- Ач келгенни – тойдур, кеч келгенни – къондур.
- Къарны аманнга къазан такъдырма, къолу аманнга от джакъдырма.
- Ана кёлю – балада, бала кёлю – талада.
- Къолу уллу – асыу, аягъы уллу – джарсыу.
- Эр сокъур болсун, къатын тилсиз болсун.
- Сёз – кюмюш, джыр – алтын.
- Олтуруб кёрюнмей эди да, ёрге туруб кёрюне эди.
- Халкъны юйю – туугъан джери.
- Адамны сыфатына къарама, сёзюне къара.
- Ач къалгъандан, кеч къалгъан къолай.
- Башсыз урчукъ тюзюне айланмаз.
- Тилде сюек болмаса да, сюек сындырыр.
- Уллу айтханны этмеген – уллаймаз.
- Аман адам этегингден тутса, кес да къач.
Ошибка!
Для просмотра темы введите ваши логин и пароль.Пожалуйста, авторизуйтесь: