- Ишленмеген джаш – джюгенсиз ат, ишленмеген къыз – тузсуз хант.
- Алтыда кюлмеген, алтмышда кюлмез.
- Къарыусузгъа кюлме, онгсузгъа тийме.
- Аман къатын алгъан, арыр, иги къатын алгъан джарыр.
- Аманны тукъумуна къарама, игини тукъумун сорма.
- Айтханы чапыракъдан ётмеген.
- Къыйынлы джети элге оноу этер.
- Ашхы – джыяр, аман – джояр.
- Ёксюзню тилеги къабыл болур.
- Джукъу тёшек сайламайды.
- Иги адам абынса да, джангылмаз.
- Ашарыкъда сайлагъаннга – чий гырджын.
- Таукелге нюр джауар.
- Хар адамгъа кеси миннген тау кибик.
- Ариуну – ауруу кёб.
- Тойгъан джерден туугъан джер игиди.
- Дуния аламаты сен эсенг да, игиме деб айтма.
- Эшекге миннген – биринчи айыб, андан джыгъылгъан – экинчи айыб.
- Сабий кёргенин унутмаз.
- Къартны бурнун сюрт да, оноугъа тут.
- Ана – юйню кюн джарыгъы.
- Аурууну келиую тынч, кетиую – къыйын.
- Элге къуллукъ этмеген, элге ие болмаз.
- Аджашхан тёгерек айланыр.
- Аз айтсам, кёб ангылагъыз.
- Тюзлюк шохлукъну бегитир.
- Джырына кёре эжиую.
- Гырджын – тепсини тамадасы.
- Рысхы – насыбха къор.
- Адам боллукъ, атламындан белгили болур.
- Узун джолну барсанг, бюгюн келирсе, къысха джолну барсанг, тамбла келирсе.
- Агъач – джерни чырайы, кийим – эрни чырайы.
- Тойну къарнашы – харс, джырны къарнашы – эжиу.
- Чабакъсыз кёлге къармакъ салгъанлыкъгъа, чабакъ тутмазса.
- Ишге юренсин къоллары, халкъ бла болсун джоллары.
- Ётюрюк хапар аякъ тюбю бла джюрюйдю.
- Эртде тургъан бла эртде юйленнген сокъуранмаз.
- Арпа, будай – ащды, алтын, кюмюш а – ташды.
- Эринчекни аурууу – кёб.
- Эки элинги тыйсанг, джети элде махталырса.
- Мал кёб болса, джууукъ кёб болур.
- Джол бла сёзню къыйыры джокъ.
- Тенги кёбню джау алмаз, акъылы кёбню дау алмаз.
- Сабыр джетер муратха, сабырсыз къалыр уятха.
- Керти сёзге тёре джокъ.
- Орундукъ тюбюнде атылсам да, орта джиликме, де да айлан.
- Хар сёзню орну барды.
- Аллахдан тилесенг, кёб тиле.
- Ашхы сёз таш тешер.
- Садакъачыны джаны – къапчыгъында.
Ошибка!
Для просмотра темы введите ваши логин и пароль.Пожалуйста, авторизуйтесь: