- Иги адам абынса да, джангылмаз.
- Ауузу аманнга «иги», деме.
- Билмезни кёзю кёрмез, этмезни къулагъы эшитмез.
- Гитче джилтин уллу элни джандырыр.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Къызгъанчдан ычхыныр, мухардан ычхынмаз.
- Юй ишлеген балта эшикде къалыр.
- Кесинг сынамагъан затны, адамгъа буюрма.
- Онгсузну – джакъла, тенгликни – сакъла.
- Окъугъан – асыу, окъумагъан – джарсыу.
- Тойгъа барсанг, тоюб бар, эски тонунгу къоюб бар.
- Экеулен сёлеше тура эселе, орталарына барыб кирме.
- Элде адам къалмаса, ит тахтагъа минер.
- Кеси юйюмде мен да ханма.
- Джашлыкъ этмеген, башлыкъ этмез.
- Кюн кёрмеген, кюн кёрсе, кюндюз чыракъ джандырыр.
- Сакъалы текени да бар, мыйыгъы киштикни да бар.
- Тил бла келеди джыр да.
- Баргъанынга кёре болур келгенинг.
- Ач уят къоймаз.
- Чабакъсыз кёлге къармакъ салгъанлыкъгъа, чабакъ тутмазса.
- Ашхылыкъ джерде джатмайды, аманлыкъ суугъа батмайды.
- Ёксюзню къалачы уллу кёрюнюр.
- Адамны аты башхача, акъылы да башхады.
- Тил джюрекге джол ишлейди.
- Ариуну – ауруу кёб.
- Атлыны ашхысы, ат тизгининден билинир
- Чакъырылмай келген къонакъ сыйланмай кетер.
- Джеринден айырылгъан – джети джылар, джуртундан айырылгъан – ёлгюнчю джылар.
- Таш ата билмеген, башына урур.
- Тенгинг джокъ эсе – изле, бар эсе – сакъла!
- Рысхы – сют юсюнде кёмюк кибикди.
- Джерни букъусу кёкге къонмаз.
- Аманны къуугъан, аманлыкъ табар.
- Билеги кючлю, бирни джыгъар, билими кючлю, мингни джыгъар.
- Баш – акъыл ючюн, акъылман – халкъ ючюн.
- Тиширыусуз юй – отсуз от джагъа.
- Тау башында, тау болмаз, джангыз терек, бау болмаз.
- Ёлюр джаннга, ёкюл джокъ.
- Келинин тута билмеген, къул этер, къызын тута билмеген, тул этер.
- Дженгил джетерикме деб, узун джолну къоюб, къысхасын барма.
- Зар адамны насыбы болмаз.
- Узун джолну барсанг, бюгюн келирсе, къысха джолну барсанг, тамбла келирсе.
- Аджалсыз ёлюм болмаз.
- Мал кёб болса, джууукъ кёб болур.
- Хоншуну тауугъу къаз кёрюнюр, келини къыз кёрюнюр.
- Эллинг бла джау болсанг да, юйюнг бла джау болма.
- Шапа кёб болса, аш татымсыз болур.
- Ишлемеген – тишлемез.
- Биреуге аманлыкъ этиб, кесинге игилик табмазса.
Ошибка!
Для просмотра темы введите ваши логин и пароль.Пожалуйста, авторизуйтесь: