- Кийимни бичсенг, кенг бич, тар этген къыйын тюлдю.
- Башы джабылгъан челекге, кир тюшмез.
- Адамны сыфатына къарама, сёзюне къара.
- Хансыз джомакъ болмаз.
- Дууулдаса – бал чибин, къонса – къара чибин.
- Ач къалгъандан, кеч къалгъан къолай.
- Ачыу алгъа келсе, акъыл артха къалады.
- Тёрдеги кюлсе, эшикдеги ышарыр.
- Намыс сатылыб алынмайды.
- Адам сёзюнден белгили.
- Танг атмайма десе да, кюн къоярыкъ тюйюлдю.
- Ашын ашагъанынгы, башын да сыйла.
- Эртде тургъан джылкъычыны эркек аты тай табар.
- Эки элинги тыйсанг, джети элде махталырса.
- Нёгерсизни джолу узун.
- Гитче джилтин уллу элни джандырыр.
- Хазыр ашха – терен къашыкъ.
- Тай асырагъан, атха минер.
- Къарны аманнга къазан такъдырма, къолу аманнга от джакъдырма.
- Минг тенг да азды, бир джау да кёбдю.
- Джыланны къуйругъундан басарынг келсе, аны башы болгъанын унутма.
- Аджашханны ызындагъы кёреди, джангылгъанны джанындагъы биледи.
- Сёз – кюмюш, джыр – алтын.
- Кимни – тили, тиши онглу, кимни – къолу, иши онглу.
- Тенгинг джокъ эсе – изле, бар эсе – сакъла!
- Башы ишлегенни, ауузу да ишлер.
- От этилмеген джерден тютюн чыкъмайды.
- Сангырау къулакъ эл бузар.
- Джолунга кёре – джюрюшюнг, джагъанга кёре – юлюшюнг.
- Ичимден чыкъды хата, къайры барайым сата?
- Ач келгенни – тойдур, кеч келгенни – къондур.
- Сёз къанатсыз учар.
- Таукелге нюр джауар.
- Тешик этген тынчды, аны джамагъан къыйынды.
- Джауумдан сора, кюн кюйдюрюр, ётюрюкден сора, айыб кюйдюрюр.
- Къонакъ кёб келюучю юйню, къазаны отдан тюшмез.
- Ариу сёзде ауруу джокъ.
- Чыкълы кюнде чыкъмагъан, чыкъса къуру кирмеген.
- Тойну къарнашы – харс, джырны къарнашы – эжиу.
- Къошда джокъгъа – юлюш джокъ.
- Къарнынг тойгъунчу аша да, белинг талгъынчы ишле.
- Окъдан джара эртде-кеч болса да бителир, сёз джара, ёмюрге къалыр.
- Ашатыргъа иш – ашхы, ишлетирге аш – ашхы.
- Илму – джашауну джолу.
- Айтханы чапыракъдан ётмеген.
- Элде адам къалмаса, ит тахтагъа минер.
- Уясында не кёрсе, учханында аны этер.
- Сабийликде юретмесенг, уллу болса – тюзелмез.
- Ургъан суудан башынгы сакъла.
- Ариу сёз аурууунгу алыр.
Ошибка!
Для просмотра темы введите ваши логин и пароль.Пожалуйста, авторизуйтесь: