- Мал тутхан – май джалар.
- Эл ауузу – элия.
- Ачлыкъ отха секиртир.
- Джарлыны тону джаз битер.
- Тили узунну, намысы – къысха.
- Джыланны къуйругъундан басарынг келсе, аны башы болгъанын унутма.
- Алтыннга тот къонмаз.
- Сакъ юйюне сау барыр.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Тешигини къатында, чычхан да батыр болур.
- Суугъа – чабакъ, къаягъа – ыргъакъ.
- Элге къуллукъ этмеген, элге ие болмаз.
- Эрни эр этерик да, къара джер этерик да, тиширыуду.
- Акъыллы башны – тили къысха.
- Ашхы – джыяр, аман – джояр.
- Къулакъдан эсе, кёзге ышан.
- Баш болса, бёрк табылыр.
- Элни кючю – эмеген.
- Тёгюлген тюгел джыйылмайды.
- Джаралыны джастыгъында сау ёлюр.
- Джаным-тиним – окъуу, билим.
- Хатерли къул болур.
- Къонакъ аз олтурур, кёб сынар.
- Рысхы – сют юсюнде кёмюк кибикди.
- Къонагъы джокъну – шоху джокъ.
- Ата Джуртча джер болмаз, туугъан элча эл болмаз.
- Ат да турмайды бир териде.
- Айырылмаз джууугъунга, унутмаз сёзню айтма.
- Таукел адам тау тешер.
- Танг атмайма десе да, кюн къоярыкъ тюйюлдю.
- Кеси юйюмде мен да ханма.
- Башсыз урчукъ тюзюне айланмаз.
- Къыйынлы джети элни къайгъысын этер.
- Ойнай билмеген, уруб къачар.
- Зар адамны насыбы болмаз.
- Кюн кёрмеген, кюн кёрсе, кюндюз чыракъ джандырыр.
- Ашхы атаны – джашы ашхы, ашхы ананы – къызы ашхы.
- Тура эдим джата, къайдан чыкъды хата?
- Джашлыкъ этмеген, башлыкъ этмез.
- Джарашыу сюйген – джалынчакъ.
- Окъугъан – асыу, окъумагъан – джарсыу.
- Ургъан суудан башынгы сакъла.
- Къартха ушагъан джаш – акъыллы, джашха ушагъан къарт – тели.
- Тюкюрюк баш джармаз, налат кёз чыгъармаз!
- Урунуу – насыбны анасы.
- Ашхы тенг джолгъа салыр, аман тенг джолдан тайдырыр.
- Джюз элде джюз ёгюзюм болгъандан эсе, джюз джууугъум болсун.
- Бюгюн дуния кибик, тамбла ахыратды.
- Шапа кёб болса, аш татымсыз болур.
- Кийим тукъум сордурур.
Ошибка!
Для просмотра темы введите ваши логин и пароль.Пожалуйста, авторизуйтесь: