- Ашда – бёрю, ишде – ёлю.
- Эки элинги тыйсанг, джети элде махталырса.
- Этек чакъмакълары баш джаргъан, сёлешген сёзлери таш джаргъан.
- Арба аугъандан сора, джол кёргюзтюучю кёб болур.
- Адамны джюреги нени кёрюрге сюйсе, кёзю да аны кёрюрге ёч болады.
- Ашхылыкъ джерде джатмайды, аманлыкъ суугъа батмайды.
- Къонакъ кёб келюучю юйню, къазаны отдан тюшмез.
- Сормай – алма, чакъырылмай – барма.
- Эрине къаргъыш этген къатын, эрнин къабар.
- Къонакъны къачан кетерин сорма, къачан келлигин сор.
- Тамырсыз терекге таянма – джыгъылырса.
- Хар адамгъа кеси миннген тау кибик.
- Тил бла келеди джыр да.
- Халкъгъа джарагъан, джарлы къалмаз.
- Этим кетсе да, сюегим къалыр.
- Хунаны тюбюн къазсанг, юсюнге ауар.
- Баланы адам этген анады.
- Аман хансны – урлугъу кёб.
- Аманнга алтын чыдамаз.
- Харам къарнашдан, халал тенг ашхы.
- Джаханимни кёрмей, джандетге кёл салмазса.
- Аз сёлешген, къайгъысыз турур.
- Юйюнгден чыкъдынг – кюнюнгден чыкъдынг.
- Къозулугъунда тоймагъан, къойлугъунда тоймаз.
- Кёбден умут этиб, аздан къуру къалма.
- Рысхы джалгъанды: келген да этер, кетген да этер.
- Босагъа таш юйге кирмей эди, тыбыр таш эшикге чыкъмай эди.
- Бозанг болмагъан джерге, къалагъынгы сукъма.
- Джангызны оту джарыкъ джанмаз!
- От этилмеген джерден тютюн чыкъмайды.
- Джумушакъ терекни къурт ашар.
- Тин – байлыгъынг, терен саулугъунг.
- Атлыны кёрсе, джаяуну буту талыр.
- Урунуу – насыбны анасы.
- Иги сеники эсе да, сюйген кесимикин этеме.
- Бастасын ашагъан, хантусун да ичер.
- Тилчиден кери бол.
- Ата – билек, ана – джюрек!
- Адебсиз адам – джюгенсиз ат.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Гитче джилтин уллу элни джандырыр.
- Бал ашаргъа сюе эсенг, чибин ургъаннга тёз.
- Айран ичген – къутулду, джугъусун джалагъан – тутулду.
- Ётюрюкню къуйругъу – бир тутум.
- «Ёгюз, джаргъа джууукъ барма, меннге джюк боллукъса», - дегенди эшек.
- Аман адам элни бир-бирине джау этер.
- Айырылгъанланы айю ашар, бёлюннгенлени бёрю ашар.
- Джеринден айырылгъан – джети джылар, джуртундан айырылгъан – ёлгюнчю джылар.
- Къартны сыйын кёрмеген, къартлыгъында сыйлы болмаз.
- Иги болса, тамадама – махтау, аман болса, меннге – айыб.
Ошибка!
Для просмотра темы введите ваши логин и пароль.Пожалуйста, авторизуйтесь: