- Керилген да, ургъан кибикди.
- Асхат ашлыкъ сата, юйдегиси ачдан къата.
- Аз сёлеш, кёб ишле.
- Ачылгъан эт джабылыр, кёрген кёз унутмаз.
- Бек ашыкъгъан меннге джетсин, дегенди аракъы.
- Терек ауса, отунчу – кёб.
- Аджалсыз ёлюм болмаз.
- Уллу атлама – абынырса, уллу къабма – къарылырса.
- Илму – джашауну джолу.
- Биреу къой излей, биреу той излей.
- Ариу джол аджал келтирмез.
- Этим кетсе да, сюегим къалыр.
- Эки итни арасына сюек атма, эки адамны арасында сёз чыгъарма.
- Аманнга игилик этсенг, юйюнге сау бармазса.
- Керек ташны ауурлугъу джокъ.
- Биреуню къыйынлыгъы бла кесинге джол ишлеме.
- Байны оноуу, джарлыгъа джарамаз.
- Суу кетер, таш къалыр.
- Тойгъандан сора, ашны сёкме.
- Джеринден айырылгъан – джети джылар, джуртундан айырылгъан – ёлгюнчю джылар.
- Кёпюр салгъан кеси ётер, уру къазгъан кеси кетер.
- Уруну арты – къуру.
- Ёгюзню мюйюзюнден тутадыла, адамны сёзюнден тутадыла.
- Джангыз торгъай джырламаз.
- Ачыу алгъа келсе, акъыл артха къалады.
- Къолунгдан къуймакъ ашатсанг да, атаны борчундан къутулмазса.
- Кёб джат да, бек чаб.
- Къайгъы тюбю – тенгиз.
- Кенгеш болса, уруш болмаз.
- Экиндини кеч къылсанг, чабыб джетер ашхам.
- Иги джашны ышаны – аз сёлешиб, кёб тынгылар.
- Сютню башын джалагъан къутулур, тюбюн ичген тутулур.
- Эркиши – от, тиширыу – суу.
- Ана кёлю – балада, бала кёлю – талада.
- Окъуу – билимни ачхычы, окъуу – дунияны бачхычы.
- Адамны адамлыгъы къыйынлыкъда айгъакъланады.
- Къонагъы джокъну – шоху джокъ.
- Намыс сатылыб алынмайды.
- Уллу къазанда бишген эт, чий къалмаз.
- Сууда джау джокъ, кёб сёзде магъана джокъ.
- Байма, деб да, къууанма, джарлыма, деб да, джылама.
- Тешигини къатында, чычхан да батыр болур.
- Окъугъан озар, окъумагъан тозар.
- Минг тенг да азды, бир джау да кёбдю.
- Джукъу тёшек сайламайды.
- Хазыр ашха – терен къашыкъ.
- Джыйырма къойну юч джыйырма эбзе кюте эди.
- Сабий кёргенин унутмаз.
- Ёпкелегенни ашы татлы болады.
- Акъыл къартда, джашда тюйюлдю – башдады.
Ошибка!
Для просмотра темы введите ваши логин и пароль.Пожалуйста, авторизуйтесь: