- Алим болгъандан эсе, адам болгъан къыйынды.
- Атлыны кёрсе, джаяуну буту талыр.
- Билмегенинги, билгеннге сор.
- Аман адамны тепсинге олтуртсанг, къызынгы тилер.
- Ишленмеклик адамлыкъды.
- Сёз садакъдан кючлюдю.
- Насыб бютеу халкъны юлюшюдю.
- Эм ашхы къайын ана мамукъ бла башынгы тешер.
- Арбаз къынгырды да, ийнек сауалмайма.
- «Ма», - дегенни билмесенг, «бер», - дегенни билмезсе.
- Къумурсхала джыйылсала, пилни да джыгъадыла.
- Садакъачыны джаны – къапчыгъында.
- Тойгъан джерге джети къайт.
- Кюл тюбюндеги от кёрюнмейди.
- Тёрде – темир таякълы, къаяда – чыпчыкъ аякълы.
- Къарын къуру болса, джюрек уру болур.
- Айырылмаз джууугъунга, унутмаз сёзню айтма.
- Аджаллыгъа окъсуз шкок атылыр.
- Эл тойса, тоймагъан, эл къойса, къоймагъан.
- Кесине гебен этелмеген, биреуге черен эте эди.
- Адамны джюреги нени кёрюрге сюйсе, кёзю да аны кёрюрге ёч болады.
- Окъугъан – асыу, окъумагъан – джарсыу.
- Джуртун къоругъан озар.
- Бети къызарыучу адамны, джюреги харам болмаз.
- Аман адам элни бир-бирине джау этер.
- Къазанчы аман болса, къазаны къайнамаз.
- Тёзгеннге, джабылгъан эшик ачылыр.
- Эрни эр этерик да, къара джер этерик да, тиширыуду.
- Джети тилни билген джети кишиди.
- Ариуну – ауруу кёб.
- Кёрмегеннге кебек – танг, битмегеннге сакъал – танг.
- Сабийликде юретмесенг, уллу болса – тюзелмез.
- Намыс сатылыб алынмайды.
- Ёгюзню мюйюзюнден тутадыла, адамны сёзюнден тутадыла.
- Таугъа чыгъаллыкъ эсенг, тюзде къалма.
- Ишлегенден, къарагъан уста.
- Къонагъынгы артмагъын алма да, алгъышын ал.
- Чакъырылмагъан джерге барма, чакъырылгъан джерден къалма.
- Адам бла мюлк юлешмеген эсенг, ол адамны билиб бошагъанма, деб кесинги алдама.
- Къатыны харакетли болса, эри къымсыз болур.
- Кеси юйюмде мен да ханма.
- Джаш болсун, къыз болсун, акъылы, саны тюз болсун.
- Адеб джокъда, намыс джокъ.
- Чабакъгъа акъыл, табагъа тюшсе келеди.
- Тенгни тенглиги джашай барсанг билинир.
- Къар – келтирди, суу – элтди.
- Бал – татлы, балдан да бала – татлы.
- Къарт айтханны этмеген, къартаймаз.
- Чомартха Тейри да борчлуду.
- Кёлсюзден сёзсюз тууар.
Ошибка!
Для просмотра темы введите ваши логин и пароль.Пожалуйста, авторизуйтесь: