- Бал ашаргъа сюе эсенг, чибин ургъаннга тёз.
- Айранны сюйген, ийнек тутар.
- Тойчу джашха къарама, къойчу джашха къара.
- Татлы тилде – сёз ариу, чемер къолда – иш ариу.
- Хаухну атма, ёнгкючню сатма.
- Аурууну келиую тынч, кетиую – къыйын.
- Рысхы джалгъанды: келген да этер, кетген да этер.
- Ашыкъгъан cуу, тенгизге джетмез.
- Агъач – джерни чырайы, кийим – эрни чырайы.
- Уллу къашыкъ эрин джыртар.
- Терслик кетер, тюзлюк джетер.
- Ат да турмайды бир териде.
- Ана къойну – балагъа джандет.
- Гитче джилтин уллу элни джандырыр.
- Огъурлуну сёзю – суу, огъурсузну сёзю – уу.
- Эртде тургъан джылкъычыны эркек аты тай табар.
- Уллу къазанда бишген эт, чий къалмаз.
- Эртде тургъан бла эртде юйленнген сокъуранмаз.
- Ёпкелегенни ашы татлы болады.
- Джолунга кёре – джюрюшюнг, джагъанга кёре – юлюшюнг.
- Эски джаугъа ышанма.
- Ариу джол аджал келтирмез.
- Олтуруб кёрюнмей эди да, ёрге туруб кёрюне эди.
- Айран тёгюлсе, джугъусу къалыр.
- Къызны минг тилер, бир алыр.
- Тёрени джагъы джокъ.
- Бойнуму джети джерден кессенг да, мен ол ишни этеллик тюлме.
- Джумушакъ сёз къаты таякъны сындырыр.
- Тюкюрюк баш джармаз, налат кёз чыгъармаз!
- Уллу атлама – абынырса, уллу къабма – къарылырса.
- Ашаса, ашамаса да, бёрюню ауузу – къан.
- Хар ишни да аллы къыйынды.
- Биреуню тёрюнден, кесинги эшик артынг игиди.
- Биреуню къыйынлыгъы бла кесинге джол ишлеме.
- Эринчекни аурууу – кёб.
- Джаралыны джастыгъында сау ёлюр.
- Ёлюр джаннга, ёкюл джокъ.
- Билим насыб берир, билим джолну керир.
- Кесине оноу эте билмеген, халкъына да эте билмез.
- Джол бла сёзню къыйыры джокъ.
- Ишлегенден, къарагъан уста.
- Тамбла алтындан бюгюн багъыр ашхы.
- Эркиши – от, тиширыу – суу.
- Рысхы – насыбха къор.
- Элге къуллукъ этмеген, элге ие болмаз.
- Байны къызы баймакъ болса да, юйде къалмаз!
- Биреуге кёлтюрген таягъынг, кесинги башынга урур.
- Бетинги сатма, малынгы сат.
- Джангыз терек къынгыр ёсер.
- Азыгъы аз, алгъа къабар, аты аман, алгъа чабар.
Ошибка!
Для просмотра темы введите ваши логин и пароль.Пожалуйста, авторизуйтесь: