- Къар – келтирди, суу – элтди.
- Эр сокъур болсун, къатын тилсиз болсун.
- Тилчи тилден къаныкъмаз.
- Туз, гырджын аша, тюзлюк бла джаша.
- Ашда – бёрю, ишде – ёлю.
- Ачыкъ джюрекге джол – ачыкъ.
- Ким бла джюрюсенг, аны кёзю бла кёрюнюрсе.
- Тюкюрюк баш джармаз, налат кёз чыгъармаз!
- Тил бла келеди джыр да.
- Тамбла алтындан бюгюн багъыр ашхы.
- От кюйдюрген, сау болса да, тот кюйдюрген, сау болмаз.
- Аман хансны – урлугъу кёб.
- Уллу къашыкъ эрин джыртар.
- Джашда акъыл джокъ, къартда къарыу джокъ.
- Ётюрюкню башын керти кесер.
- Эшекге миннген – биринчи айыб, андан джыгъылгъан – экинчи айыб.
- Бети – къучакълар, джюреги – бычакълар.
- Бастасын ашагъан, хантусун да ичер.
- Эм уллу байлыкъ – джан саулукъ.
- Кийим тукъум сордурур.
- Аманны эки битли тону болур, бирин сеннге кийдирир, бирин кеси киер.
- Булут кёкге джарашыу, уят бетге джарашыу.
- Къазанчы аман болса, къазаны къайнамаз.
- Билгенни къолу къарны джандырыр.
- Ач отунчуну ачыуу – бурнунда.
- Хаухну атма, ёнгкючню сатма.
- Соргъан айыб тюлдю, билмеген айыбды.
- Аджашханны ызындагъы кёреди, джангылгъанны джанындагъы биледи.
- Байлыкъдан саулукъ ашхыды.
- Адеб джокъда, намыс джокъ.
- Уруну арты – къуру.
- Ариу сёз – джаннга азыкъ, аман сёз – башха къазыкъ.
- Киштикге къанат битсе, чыпчыкъ къалмаз эди.
- Иги адамны бир сёзю эки болмаз.
- Терслик кетер, тюзлюк джетер.
- Аш берме да, къаш бер.
- Арбаз сайлама да, хоншу сайла.
- Тойчу джашха къарама, къойчу джашха къара.
- Мухар, кеси тойса да, кёзю тоймаз.
- Ёгюзню мюйюзюнден тутадыла, адамны сёзюнден тутадыла.
- Кёзюнде тереги болгъан, чёбю болгъаннга кюле эди.
- Тойгъандан сора, ашны сёкме.
- Акъыллы эркиши атын махтар, акъылсыз эркиши къатынын махтар.
- Ёмюрлюк шохлукъну джел элтмез.
- Аш кетер да бет къалыр.
- Арпа, будай – ащды, алтын, кюмюш а – ташды.
- Телиге акъыл салгъандан эсе, ёлгеннге джан салырса.
- Ётюрюкню къуйругъу – бир тутум.
- Келинни – келгинчи, бёркню кийгинчи кёр.
- Кёпюр салгъан кеси ётер, уру къазгъан кеси кетер.
Ошибка!
Для просмотра темы введите ваши логин и пароль.Пожалуйста, авторизуйтесь: