- Ашда – бёрю, ишде – ёлю.
- Эки къатын алгъан – эки ташны ортасына башын салгъан.
- Ишге юренсин къоллары, халкъ бла болсун джоллары.
- Чомартха хар кюн да байрамды.
- Сакъламагъан затынга джолукъсанг, не бек къууанаса, не бек ачыйса.
- Келинин тута билмеген, къул этер, къызын тута билмеген, тул этер.
- Бал ашаргъа сюе эсенг, чибин ургъаннга тёз.
- Нарт сёз къарт болмаз.
- Насыб бютеу халкъны юлюшюдю.
- Борчунг бар эсе, хурджунунга ойлаб узал.
- Ёгюзню мюйюзюнден тутадыла, адамны сёзюнден тутадыла.
- Адам сёзюнден белгили.
- Адамны джюреги нени кёрюрге сюйсе, кёзю да аны кёрюрге ёч болады.
- Акъыл бла адеб эгизледиле.
- Насыблы элин сюер, насыбсыз кесин сюер.
- Къайтырыкъ эшигинги, къаты уруб чыкъма.
- Булут кёкге джарашыу, уят бетге джарашыу.
- Адеб джокъда, намыс джокъ.
- Къонакъ аман болса, къонакъбай джунчур
- Кесине гебен этелмеген, биреуге черен эте эди.
- Ким бла джюрюсенг, аны кёзю бла кёрюнюрсе.
- Этим кетсе да, сюегим къалыр.
- Чомарт къолда мал къалмаз.
- Аман эсирсе, юйюн ояр.
- Азыкъ аз болса, эртде орун сал.
- Келлик заман – къартлыкъ келтирир, кетген заман – джашлыкъ ёлтюрюр.
- Сакъ юйюне сау барыр.
- Аякъларынгы джууургъанынга кёре узат.
- Кенгеш болса, уруш болмаз.
- Ауругъанны сау билмез, ач къарынны токъ билмез.
- Чакъырылмай келген къонакъ сыйланмай кетер.
- Кёб джашагъан – кёб билир.
- Ётюрюкчюню шагъаты – къатында.
- Хар сёзню орну барды.
- Ушамагъан – джукъмаз.
- Джангыз терек къынгыр ёсер.
- Тил джюрекге джол ишлейди.
- Кийимни бир кюнню аясанг, минг кюннге джарар.
- Аджашхан тёгерек айланыр.
- Ойнай билмеген, оюн бузар.
- Башынга джетмегенни сорма.
- Къалгъан ишге къар джауар.
- Джаш болсун, къыз болсун, акъылы, саны тюз болсун.
- Ышармагъан – кюлмез, кюлмеген – къууанчны билмез.
- Ханнга да келеди хариблик.
- Джашынгы кесинг юретмесенг, джашау юретир.
- Тура эдим джата, къайдан чыкъды хата?
- Ашыкъгъанны этеги бутуна чырмалыр.
- Насыблыны баласы кюн кюнден да баш болур, насыбсызны баласы, кюн кюнден да джаш болур.
- Дуния аламаты сен эсенг да, игиме деб айтма.
Ошибка!
Для просмотра темы введите ваши логин и пароль.Пожалуйста, авторизуйтесь: