- Эте билген, этген этеди, эте билмеген, юретген этеди!
- Къартны бурнун сюрт да, оноугъа тут.
- Къарнынг ауруса, ауузунгу тый
- Шекер бла туз – бир болмаз, ушамагъан – юй болмаз.
- Гугурук къычырмаса да, тангны атары къалмаз.
- Баш болса, бёрк табылыр.
- Халкъгъа джарагъан, джарлы къалмаз.
- Азыгъы аз, алгъа къабар, аты аман, алгъа чабар.
- Мухарны эси – ашарыкъда.
- Джылар джаш, атасыны сакъалы бла ойнар.
- Ачыкъ джюрекге джол – ачыкъ.
- Иги джашны ышаны – аз сёлешиб, кёб тынгылар.
- Бети къызарыучу адамны, джюреги харам болмаз.
- Намыс болмагъан джерде, насыб болмаз.
- Бети бедерден, намыс сакълама.
- Онгсузну – джакъла, тенгликни – сакъла.
- Тамчы таш тешер.
- Башда акъыл болмаса, эки аякъгъа кюч джетер.
- Атадан ёксюз – бир ёксюз, анадан ёксюз – эки ёксюз.
- Таукел тауну аудурур.
- Байлыкъ келсе, акъыл кетер.
- Нёгер болсанг, тенг бол, тенг болмасанг, кенг бол.
- Къызны минг тилер, бир алыр.
- Къонакъ кёб келюучю юйню, къазаны отдан тюшмез.
- Бети – къучакълар, джюреги – бычакълар.
- Сёз къанатсыз учар.
- Намыс сатылыб алынмайды.
- Кёлю джокъну – джолу джокъ.
- Юреннген ауруу къалмаз.
- Хар зат кесини орнуна иги.
- Бетинги сатма, малынгы сат.
- Кюн – узун, ёмюр – къысха.
- Кимни – тили, тиши онглу, кимни – къолу, иши онглу.
- Таула не мийик болсала да, аууш табылыр.
- Атлыны кёрсе, джаяуну буту талыр.
- Аман адамны тепсинге олтуртсанг, къызынгы тилер.
- Тойгъан джерден туугъан джер игиди.
- Ашыкъгъанны этеги бутуна чырмалыр.
- Къар – келтирди, суу – элтди.
- Арбаз къынгырды да, ийнек сауалмайма.
- Аджаллыгъа окъсуз шкок атылыр.
- Биреуге аманлыкъны тилеме да, кесинге ашхылыкъны тиле.
- Биреуню къыйынлыгъы бла кесинге джол ишлеме.
- Къонакъ болсанг, ийнакъ бол.
- Халкъны юйю – туугъан джери.
- Ишин билген, аны сыйын чыгъарады.
- Ашатыргъа иш – ашхы, ишлетирге аш – ашхы.
- Рысхы джалгъанды: келген да этер, кетген да этер.
- Башы джабылгъан челекге, кир тюшмез.
- Уллу къашыкъ эрин джыртар.
Ошибка!
Для просмотра темы введите ваши логин и пароль.Пожалуйста, авторизуйтесь: