- Агъач халкъгъа алтынды, иссиликге салкъынды.
- Эркишини аманы тиширыуну джылатыр.
- Адам къаллай бир ишленмесе, аллай бир кесин уллу кёреди.
- Алим болгъандан эсе, адам болгъан къыйынды.
- Джарлыны эшигин махтагъан джабар.
- Aдам боллукъ, сыфатындан белгили.
- Биреу ашаб къутулур, биреу джалаб тутулур.
- Баш болса, бёрк табылыр.
- «Ёгюз, джаргъа джууукъ барма, меннге джюк боллукъса», - дегенди эшек.
- Билим насыб берир, билим джолну керир.
- Башынга джетмегенни сорма.
- Джангыз торгъай джырламаз.
- Къатын къылыкъсыз, эр тынчлыкъсыз.
- Сескекли кесин билдирир.
- Адеб джокъда, намыс джокъ.
- Битмегеннге сакъал – танг.
- Чомартны къолун джокълукъ байлар.
- Аз сёлешген, къайгъысыз турур.
- Тамбла алтындан бюгюн багъыр ашхы.
- Ишни ахырын ойламай, аллын башлама.
- Ашда уялгъан – мухар, ишде уялгъан – хомух.
- Таш бла ургъанны, аш бла ур.
- Ашхы сёз таш тешер.
- Эки ойлашыб, бир сёлешген.
- Ашына кёре табагъы, балына кёре къалагъы.
- Чомарт къолда мал къалмаз.
- Джиби бир къат джетмей эди да, эки къат тарта эди.
- Къыйынлы джети элге оноу этер.
- Огъурлуну сёзю – суу, огъурсузну сёзю – уу.
- Дуния малгъа сатылма, кесингден телиге къатылма.
- Мал тутхан – май джалар.
- Тюзню ётмеги тюзде къалса да, тас болмаз.
- Джахил болса анасы, не билликди баласы?
- Экеу тутушса, биреу джыгъылыр.
- Рысхы – сют юсюнде кёмюк кибикди.
- Кеси юйюмде мен да ханма.
- Ана къойну – балагъа джандет.
- Аманны эки битли тону болур, бирин сеннге кийдирир, бирин кеси киер.
- Кийимни бир кюнню аясанг, минг кюннге джарар.
- Ашыкъгъан cуу, тенгизге джетмез.
- Бек анасы джыламаз.
- Сыфатында болмагъаны, суратында болмаз.
- Орундукъ тюбюнде атылсам да, орта джиликме, де да айлан.
- Ичимден чыкъды хата, къайры барайым сата?
- Къызгъанчдан ычхыныр, мухардан ычхынмаз.
- Ишлегенден, къарагъан уста.
- Тёрдеги кюлсе, эшикдеги ышарыр.
- Келлик заман – къартлыкъ келтирир, кетген заман – джашлыкъ ёлтюрюр.
- Дууулдаса – бал чибин, къонса – къара чибин.
- Ата Джуртун танымагъан, атасын да танымаз.
Ошибка!
Для просмотра темы введите ваши логин и пароль.Пожалуйста, авторизуйтесь: