- Къарны аманнга къазан такъдырма, къолу аманнга от джакъдырма.
- Тура эдим джата, къайдан чыкъды хата?
- Юйюнг бла джау болгъандан эсе, элинг бла джау бол.
- Иги бла джюрюсенг, джетерсе муратынга, аман бла джюрюсенг, къалырса уятха.
- Тынгылагъан тынгы бузар.
- Къонакъ аман болса, къонакъбай джунчур
- Эртде тургъан джылкъычыны эркек аты тай табар.
- Адам къыйынлыгъын кёлтюрюр, зауукълугъун кёлтюрмез.
- Къалгъан ишге къар джауар.
- Намыс болмагъан джерде, насыб болмаз.
- Ашыкъгъан cуу, тенгизге джетмез.
- Бал ашаргъа сюе эсенг, чибин ургъаннга тёз.
- Ханы къызы буюгъа-буюгъа киштик болду.
- Джетген къыз джерли эшекни танымаз.
- Джаз бир кюнню джатсанг, къыш талай кюнню абынырса.
- Тыш элде солтан болгъандан эсе, кесинги элде олтан болгъан игиди!
- Тёзгеннге, джабылгъан эшик ачылыр.
- Чомартны къолу берекет.
- Къызны минг тилер, бир алыр.
- Хар ишни да аллы къыйынды.
- Акъыл аздырмаз, билим тоздурмаз.
- Чомартха Тейри да борчлуду.
- Чабар ат – джетген къыз.
- Аз айтсам, кёб ангылагъыз.
- Бети къызарыучу адамны, джюреги харам болмаз.
- Тенги кёбню джау алмаз, акъылы кёбню дау алмаз.
- Ёлген ийнек сютлю болур.
- Аш берме да, къаш бер.
- Сангырау къулакъ эл бузар.
- От кюйдюрген, сау болса да, тот кюйдюрген, сау болмаз.
- Чыкълы кюнде чыкъмагъан, чыкъса къуру кирмеген.
- Къонакъ аз олтурур, кёб сынар.
- Адеби болмагъан къыз – тузсуз хант.
- Тай асырагъан, атха минер.
- Ата Джуртуму башы болмасам да, босагъасында ташы болайым.
- Кёзюнде тереги болгъан, чёбю болгъаннга кюле эди.
- Айран ичген – къутулду, джугъусун джалагъан – тутулду.
- Эки къатын алгъанны къулагъы тынгнгаймаз.
- Билмегенинги, билгеннге сор.
- Эл бла кёргенинг эрелей.
- Ханнга да келеди хариблик.
- Сютню башын джалагъан къутулур, тюбюн ичген тутулур.
- Баш болса, бёрк табылыр.
- Адамгъа аман кюн соруб келмейди.
- Азыкъ аз болса, эртде орун сал.
- Гыдай эчки суугъа къараб, мюйюзле кёрмесе, джашма алкъын, дегенди.
- Тили узунну, намысы – къысха.
- Сёлеш деб шай берген, тохта деб, сом берген.
- Ётюрюкчюню шагъаты – къатында.
- Аз сёлеш, кёб ишле.
Ошибка!
Для просмотра темы введите ваши логин и пароль.Пожалуйста, авторизуйтесь: