- Ётюрюкчюню шагъаты – къатында.
- Берекет берсин деген джерде, берекет болур.
- Биреуню къыйынлыгъы бла кесинге джол ишлеме.
- Мухардан ач ычхынмаз.
- Къан бла кирген, джан бла чыгъар.
- Тюз сёз баргъан сууну тыяр.
- Джуртун къоругъан озар.
- Тенгни тенглиги джашай барсанг билинир.
- Адамны джюреги нени кёрюрге сюйсе, кёзю да аны кёрюрге ёч болады.
- Къайгъыны сюйген, къайгъы табар.
- Ишлегенде эринме, ишде чолакъ кёрюнме.
- Окъугъан – асыу, окъумагъан – джарсыу.
- Аууз сакълагъан – джан сакълар.
- Ётюрюкню башын керти кесер.
- Джырына кёре эжиую.
- Сёз къанатсыз учар.
- Аджалсыз ёлюм болмаз.
- Тура эдим джата, къайдан чыкъды хата?
- Ата Джуртуму башы болмасам да, босагъасында ташы болайым.
- Аманнга игилик этсенг, юйюнге сау бармазса.
- Кюл тюбюндеги от кёрюнмейди.
- Джырчы джырчыгъа – къарнаш.
- Ичимден чыкъды хата, къайры барайым сата?
- Аманны къуугъан, аманлыкъ табар.
- Юйюнг бла джау болгъандан эсе, элинг бла джау бол.
- Билим насыб берир, билим джолну керир.
- Ёпкелегенни ашы татлы болады.
- Къолунгдан къуймакъ ашатсанг да, атаны борчундан къутулмазса.
- Адеб джокъда, намыс джокъ.
- Аш кетер да бет къалыр.
- Бети – къучакълар, джюреги – бычакълар.
- Мал кёб болса, джууукъ кёб болур.
- Айтылгъан буйрукъ, сёгюлмез
- Юй кюйдю да, кюйюз чыкъды, ортасындан тюйюш чыкъды.
- Ойнай билмеген, оюн бузар.
- Эртде тургъан бла эртде юйленнген сокъуранмаз.
- Ауузу бла къуш тута айланады.
- Окъдан джара эртде-кеч болса да бителир, сёз джара, ёмюрге къалыр.
- Кёб ашасанг, татыуу чыкъмаз, кёб сёлешсенг, магъанасы чыкъмаз.
- Сабыр джетер муратха, сабырсыз къалыр уятха.
- Тёзгеннге, джабылгъан эшик ачылыр.
- Сёз сёзню айтдырыр.
- Эрине къаргъыш этген къатын, эрнин къабар.
- Игиге айтсанг – билир, аманнга айтсанг – кюлюр.
- Къобан да къуру да къобханлай турмайды, адам да къуру да патчахлай турмайды.
- Игини сыйлагъан адетди.
- Джогъун бар этген, барын бал этген.
- Айтхан сёзюне табылгъан.
- Кёбден умут этиб, аздан къуру къалма.
- Тулпарлыкъ, билекден тюл – джюрекден.
Ошибка!
Для просмотра темы введите ваши логин и пароль.Пожалуйста, авторизуйтесь: